Hywel Ystorm

Oddi ar Wicipedia
Jump to navigation Jump to search
Hywel Ystorm
Ganwyd 14G Edit this on Wikidata
Dinasyddiaeth Baner Cymru Cymru
Galwedigaeth bardd Edit this on Wikidata

Bardd Cymraeg a gysylltir â de Cymru oedd Hywel Ystorm (fl. ail hanner y 14g?).[1]

Bywgraffiad[golygu | golygu cod y dudalen]

Ni wyddys nemor dim amdano. Mae'r Dr John Davies o Fallwyd yn cynnig y dyddiad 1380 yn y rhestr o feirdd a luniwyd ganddo ar gyfer ei eiriadur enwog (Dictionarum Duplex, 1632). Ond does dim byd yn yr unig gerdd y gellir ei derbyn fel gwaith y bardd i ategu hynny.[1]

Anodd dweud ai epithed personol yw'r Ystorm yn ei enw neu enw lle. Ceir Stormy (Sturmieston) ym mlwyf Llandudwg, gorllewin Morgannwg, ond dyfaliad pur fyddai ei gysylltu â'r bardd.[1]

Cerdd[golygu | golygu cod y dudalen]

Dim ond un testun o waith Hywel Ystorm sydd wedi goroesi, sef dychan i un Addaf Eurych. Ar un adeg credid fod cerddi eraill sy'n ei dilyn yn Llyfr Coch Hergest yn waith y bardd hefyd, ond ni dderbynnir hyn bellach. Ceir darluniau trawiadol o oerni aelwyd Addaf a'i anfoesgarwch yn y gerdd honno. Mae'n bosibl mai bardd isradd - un o'r Glêr - oedd yr Addaf anffodus hwn.[1]

Llyfryddiaeth[golygu | golygu cod y dudalen]

  • Huw Meirion Edwards (gol.), Gwaith Prydydd Breuan a cherddi dychan eraill o Lyfr Coch Hergest (Aberystwyth, 2000). 'Cyfres Beirdd yr Uchelwyr'.

Cyfeiriadau[golygu | golygu cod y dudalen]

  1. 1.0 1.1 1.2 1.3 Huw Meirion Edwards (gol.), Gwaith Prydydd Breuan a cherddi dychan eraill o Lyfr Coch Hergest (Aberystwyth, 2000). Rhagymadrodd.