Tskhinvali

Oddi ar Wicipedia
Neidio i: llywio, chwilio
Cofeb i'r rhai fu farw yn y frwydr dros annibyniaeth, yn Tskhinvali

Prifddinas de facto gweriniaeth anghydnabyddedig De Ossetia yn y Cawcasws Deheuol sy'n cael ei chydnabod ar lefel ryngwladol fel rhan o Georgia yw Tskhinvali (sillefir hefyd fel Cchinvali neu Cxinvali; ynganiad 'Ts-cinfali') (Georgieg: ცხინვალი, Osseteg: Цхинвал neu Чъреба, Chreba). Yn ôl is-raniadau gweinyddol swyddogol Georgia, mae Tskhinvali yn ddinas yn rhanbarth Shida Kartli.

Mae'n gorwedd ar lan Afon Liakhvi Fawr tua 100 km (62 milltir) i'r gogledd-orllewin o Tbilisi, prifddinas Georgian. Ei phoblogaeth yw tua 20,000.

Ceir sawl adeilad canoloesol yn y ddinas: Eglwys Kavt'i San Sior, sy'n dyddio o tua'r 9fed ganrif, yw'r hynaf.

Yn ystod y nos ar 7 Awst 2008, ymosododd unedau o fyddin Georgia ar safleoedd ym meddiant gwrthryfelwyr Ossetiaidd yn y ddinas gan gychwyn Rhyfel De Ossetia. Ymledodd yr ymladd y diwrnod canlynol a daeth milwyr a thanciau Rwsiaidd yno i gynorthwyo lluoedd heddwch Rwsiaidd. Yn ôl adroddiadau ar 8 Awst, lladdwyd rhai cannoedd (hyd at 1400 efallai) yn yr ymladd a ffoes nifer o ddinesyddion o'r ddinas am noddfa dros y ffin.