Iwan Roberts (actor a cherddor)

Oddi ar Wicipedia
Neidio i: llywio, chwilio

Actor, canwr a thelynegwr Cymraeg yw Iwan "Iwcs" Roberts, (ganwyd 1967).

Bywgraffiad a Gyrfa[golygu]

Ganed Iwan Roberts yn nrhef Dolgellau, Gwynedd ym 1967. Fe'i magwyd ym mhentref Trawsfynydd. Cychwynodd ei yrfa fel actor yn ifanc, drwy berfformio mewn sawl Eisteddfod leol, gan gynnwys Eisteddfod Stesion ac Eisteddfod Llawr Plwy', yn ogystal a pherfformio yn Eisteddfod yr Urdd tra'n ddisgybl yn Ysgol Gynradd Trawsfynydd , lle dderbyniodd ei lysenw: "Iwcs". Ar ôl gadael yr Ysgol Uwchradd (Ysgol y Moelwyn, Blaenau Ffestiniog), gweithiodd Iwcs mewn sawl cynhyrchiant theatr gyda chwmnïau theatr megis Theatr Arad Goch, Theatr Bara Caws, ac eraill, cyn gwneud ei ymddangosiad cyntaf ar y teledu yn y gyfres Rhew Poeth ym 1986. Wedi hynny, ymddangosodd Iwcs ar sawl raglen deledu gan gynnwys treulio cyfnod byr ar ddiwedd y 1980au yn actio yn yr opera sebon Pobol y Cwm, cyn mynd yn ei flaen i actio mewn cyfresi teledu gan gynnwys y rhaglen gomedi C'mon midffîld.

Ym 1995, chwaraeodd Iwcs ran y prif gymeriad yn y gyfres ddrama A55, a ddangoswyd ar S4C. Roedd y sioe yn llwyddiant ysgubol, a derbyniodd wobr BAFTA Cymru am y Gyfres Ddrama Orau. Ym 1996, dewisodd Iwcs arallgyfeirio ei yrfa fel perfformiwr, ac ynghyd â'r gitarydd John Doyle, ffurfiodd y deuawd Iwcs a Doyle. Ym Mhontrhydfendigaid ar Ddydd Gŵyl Dewi 1996, ennillodd Iwcs a Doyle y gystadleuaeth flynyddol Cân i Gymru. Ym 1997, rhyddhaodd Iwcs a Doyle yr albwm Edrychiad Cynta', a werthodd yn dda iawn ac a dderbyniodd glod mawr. Perfformiodd Iwcs a Doyle mewn sawl lleoliad a gŵyl gerddorol, gan gynnwys Sesiwn Fawr Dolgellau, a'r Ŵyl Ban Geltaidd yn Nrhalee, Iwerddon ym 1996.

Yn 2005, cyfansoddodd a recordiodd Iwcs albwm ar ben ei hun o'r enw Cynnal Fflam. Cafodd yr albwm ei recordio yn stiwdio Gwynfryn Cymunedol, Waunfawr, a'i rhyddhau ar label y cwmni.[1][2]

Dychwelodd Iwcs i chwarae rhan Kevin Powell yn yr opera sebon Pobol y Cwm yn 2006. Mae'n parhau yn y rôl hon, fel un o'r prif gymeriadau heddiw.

Cyfeiriadau[golygu]

Cyfeirnodau[golygu]