Baner Sri Lanca

Oddi ar Wicipedia
(Ailgyfeiriad oddi wrth Baner Sri Lanka)
Neidio i: llywio, chwilio
Baner Sri Lanca FIAV 110100.svg

Mae gan faner Sri Lanca betryal yn yr hoist sydd wedi'i rannu'n hanner chwith gwyrdd a hanner dde saffron, a phetryal rhudd yn y fly â llew euraidd yn dal cleddyf ynddo. Daw enw traddodiadol yr ynys yn llenyddiaeth Sansgrit a Pali, Sinhaladvipa, o'r Sinhaleg am lew (sinha), a bu llew yn dal cleddyf yn symbol ar faner y wlad ers y 15fed ganrif. Mabwysiadwyd y faner gyda border melyn, i symboleiddio Bwdhaeth, ar 4 Chwefror 1948. Mae'r llew yn cynrychioli'r awydd am heddwch a'r rhudd yn symboleiddio balchder cenedlaethol. Ychwanegwyd y stribedi gwyrdd (am Fwslimiaid) a saffron (am y Tamiliaid) ym 1950. Mabwysiadwyd y dyluniad cyfredol ar 7 Medi 1978 pan ychwanegwyd pedair deilen y ffigysbren yng nghorneli'r petryal rhudd. Maent yn cynrychioli'r ffigysbren a wnaeth Siddartha Gautama eistedd oddi tanddi pan enillodd oleuedigaeth a daeth yn y Bwdha, ac yn unigol maent yn symboleiddio cariad, trugaredd, cydymdeimlad, a phwyll.

Ffynhonnell[golygu]

  • Znamierowski, Alfred. The World Encyclopedia of Flags (Llundain, Southwater, 2010).