Ffesant

Oddi ar Wicipedia
Neidio i: llywio, chwilio
Ffesant
Dosbarthiad gwyddonol
Teyrnas: Animalia
Ffylwm: Chordata
Dosbarth: Aves
Urdd: Galliformes
Teulu: Phasianidae
Genws: Phasianus
Rhywogaeth: P. colchicus
Enw deuenwol
Phasianus colchicus
Linnaeus, 1758
Phasianus colchicus
Phasianus colchicus

Mae'r Ffesant (Phasianus colchicus ) yn aelod o deulu'r Phasianidae, y ffesantod. O Asia y daw yn wreiddiol ond mae'n aderyn cyfarwydd trwy ran helaeth o'r byd oherwydd ei fod yn boblogaidd gyda saethwyr.

Mae'r Ffesant yn aderyn gweddol fawr, 50-90 cm o hyd, gyda'r gynffon hir yn gyfrifol am tua hanner hyn. Brown yw'r rhan fwyaf o blu'r ceiliog, ond mae'n aderyn lliwgar gyda pen gwyrdd a darnau coch a darnau gwyn, porffor a gwyrdd ar y corff. Mae'r iâr yn llai tarawiadol, gyda phlu brown a chynffon fyrrach. Mae un is-rywogaeth, P. c. torquatus, a choler wen, tra nad oes coler gan P. c. colchicus.

Mae'r Ffesant yn byw ar dir amaethyddol gyda chymysgedd o gaeau a choed fel rheol, a'u prif fwyd yw grawn a phryfed. Adeiledir y nyth ar lawr, ac maent yn dodwy oddeutu ddeg wy. Gwell ganddynt redeg ar hyd y llawr na hedfan, ond gallant hedfan yn dda ac yn gyflym pan fydd rhaid.

Ceir yr aderyn yma ar draws Ewrop a Gogledd America, ac weithiau rhyddheir miloedd lawer ohonynt gan saethwyr ar ôl eu magu'n bwrpasol. Credir iddynt gael eu gollwng yn Ynysoedd Prydain am y tro cyntaf yn y ddegfed ganrif ond yr oeddynt wedi diflannu erbyn diwedd y ddeunawfed ganrif. Gollyngwyd mwy o adar yn y 1830au ac maent yn awr yn adar cyffredin.