Mudiad Adfer

Oddi ar Wicipedia
(Ailgyfeiriad oddi wrth Adfer)
Jump to navigation Jump to search
Map gan Owain Owain yn diffinio'r Fro Gymraeg am y tro cyntaf yn Rhifyn Ionawr 1964 o Tafod y Ddraig.

Roedd Mudiad Adfer yn grŵp protest a darddodd allan o Gymdeithas yr Iaith yn yr 1970au. Tynnodd y mudiad ei syniadau o amrywiol ffynonellau, yn eu plith erthyglau gan Owain Owain [1] ac Emyr Llewelyn. Roedd y syniadau a ddatblygwyd gan yr athronydd J. R. Jones yn y 1960au ynghylch 'bychanfyd', 'troedle' i'r iaith, a 'cydymdreiddiad iaith a thir' yn ddylanwad amlwg hefyd, a dyfynnai'r athronydd yn aml o waith y bardd Waldo Williams. Credai'r mudiad mewn gwarchod "Y Fro Gymraeg" - ardal gyda'r mwyafrif o'i thrigolion yn siarad Cymraeg. gyda'r Gymraeg yn ddelfrydol yn unig iaith bywyd cyhoeddus, e.e, ar arwyddion ffyrdd. Trwy greu peuoedd uniaith yn unig y gellid diogelu'r Gymraeg fel iaith cymuned. Cyhoeddai'r mudiad gylchgrawn, Yr Adferwr, ac ymgyrchwyd dros symud cyrff cyhoeddus yn ymwneud â'r diwylliant Cymraeg o Gaerdydd i'r Fro Gymraeg.

Daeth Mudiad Adfer I ben yn ymarferol tua diwedd yr 1980au, ond mae ei syniadau gwaelodol wedi eu mabwysiadu gan gyrff megis Cymuned a Chylch yr Iaith. Gwerthai Cwmni Adfer fuddsoddiadau yn y cwmni a phrynwyd ychydig o dai, eu hadfer a'u rhentu i bobl leol, ond cyfyngedig fu llwyddiant y mentrau hyn.

Ysgrifennodd Owain Owain mewn llythyr yn 'Y Faner' (Yr Iaith - Arf Gwleidyddol):'

Achubwn y Fro Gymraeg ac fe achubir Cymru.... Fe ellir achub y Fro Gymraeg - yn fuan - drwy ddefnyddio'r iaith fel erfyn gwleidyddol.[2]

Un o sloganau'r mudiad oedd 'Tua'r Gorllewin' a cheisiwyd annog y Cymry Cymraeg i ddychwelyd i gefn gwlad Cymru. Gweler sylwadau Alan Llwyd ar awdl fuddugol T. Llew Jones yn Eisteddfod Genedlaethol Cymru Glyn Ebwy 1958.[3]

Canodd y grŵp gwerin 'Ac Eraill' a Tecwyn Ifan yntau lawer o ganeuon a adleisiai syniadaeth y mudiad e.e. 'Y Dref Wen'. Lluniodd Alan Llwyd awdl 'Adfer' sy'n adlewyrchu syniadaeth y cyfnod, ac fe'i cyhoeddwyd yn ei gyfrol Gwyfyn y Gaeaf' yn 1975. gyda'r llinell glo 'Yfory iaith: Adfer yw'.

Llyfryddiaeth[golygu | golygu cod y dudalen]

Emyr Llywelyn, Adfer a'r Fro Gymraeg (Cyhoeddiadau Modern Cymreig, 1976)

Cyfeiriadau[golygu | golygu cod y dudalen]

  1. Tafod y Ddraig Rhif 4; Ionawr 1964
  2.  Gwall wrth ddefnyddio Nodyn:Dyf gwe: mae'r paramedrau url a teitl yn angenrheidiol.. Gwefan Owain Owain. Adalwyd ar 17 Awst, 2009.
  3. 'Prif Ddigwyddiadau Hanesyddol 1958' BBC

Dolenni allanol[golygu | golygu cod y dudalen]

Flag of Wales (1959–present).svg Eginyn erthygl sydd uchod am Gymru. Gallwch helpu Wicipedia drwy ychwanegu ato.
Wiktionary-logo-cy.png
Chwiliwch am Mudiad Adfer
yn Wiciadur.