Charles Edwards

Oddi ar Wicipedia
Neidio i: llywio, chwilio
Charles Edwards
Ganwyd 1628 Edit this on Wikidata
Bu farw 1691 Edit this on Wikidata
Alma mater Coleg yr Iesu, Coleg yr Holl Eneidiau Edit this on Wikidata
Gwaith Piwritaniaeth Edit this on Wikidata

Llenor Cymraeg oedd Charles Edwards (1628 - wedi 1691), sy'n fwyaf adnabyddus fel awdur Y Ffydd Ddi-ffuant.[1]

Bywgraffiad[golygu | golygu cod y dudalen]

Ganed ef yn Rhydycroesau ym mhlwyf Llansilin, Sir Ddinbych, yn 1628. Aeth i Goleg yr Holl Eneidiau, Rhydychen, ond cofnodir iddo gael ei yrru o'r coleg yn 1648 oherwydd iddo wrthod derbyn awdurdod y Senedd. Cafodd ysgoloriaeth i Goleg yr Iesu yr un flwyddyn, a graddiodd yn 1649. Yn 1650, bu'n bregethwr teithiol yn ôl trefniadau Ddeddf Lledaenu'r Efengyl yng Nghymru, yna yn 1652-3 cafodd fywoliaeth Llanrhaeadr-ym-Mochnant. Collodd y fywoliaeth honno yn 1659.[1]

Cyhoeddodd Y Ffydd Ddi-ffuant (1667) yn Rhydychen. Yn 1671, cyhoeddodd Dad-seiniad Meibion y Daran, argraffiad newydd o gyfieithiad Morris Kyffin o lyfr yr esgob Jewel, Deffynniad Ffydd Eglwys Loegr (1595). Yr un flwyddyn, cyhoeddodd ail argraffiad o Y Ffydd Ddi-ffuant gydag ychwanegiad "Hanes y ffydd ymhlith y Cymru". Yn ddiweddarach, bu'n cydweithio a Stephen Hughes a Thomas Gouge ar waith y Welsh Trust, a bu yn Llundain hyd 1684 yn arolygu'r gwaith o gyhoeddi llyfrau Cymraeg rhad i'r tlodion. Cyhoeddodd drydydd argraffiad o Y Ffydd Ddiffuant yn 1677, a Llyfr Plygain gydag Almanac yn 1682. Bu yn ardal Croesoswallt am gyfnod, efallai yn weinidog Anghyfffurfiol yno, cyn dychwelyd i Lundain, lle cyhoeddodd An Afflicted Man's Testimony concerning His Troubles yn 1691. Ni cheir cyfeiriad ato wedi hynny.[1]

Llyfryddiaeth[golygu | golygu cod y dudalen]

  • Y Ffydd Ddi-ffuant (1667, 1671)
  • Y Ffydd Ddi-ffuant, sef, Hanes y Ffydd Gristianogl (1677). Yr argraffiad helaethach sydd wedi dod yn un o glasuron rhyddiaith Gymraeg.[1]
  • Hebraismorum Cambro-Britannicorum Specimen (1676)
  • Llyfr Plygain gydag Almanac (1682)
  • Fatherly instructions: being select pieces of the writings of the primitive Christian teachers, translated into English, with an appendix, entituled Gildas Minimus (1686)
  • An Afflicted Man's Testimony concerning His Troubles (1691)

Cyfeiriadau[golygu | golygu cod y dudalen]

  1. 1.0 1.1 1.2 1.3 Meic Stephens (gol.), Cydymaith i Lenyddiaeth Cymru (Gwasg Prifysgol Cymru).