Twyni Tywod Ynyslas

Twyni Tywod Ynyslas

Math	twyn tywod
Daearyddiaeth
Sir	Ynyslas
Gwlad	Cymru
Cyfesurynnau	52.525°N 4.057°W

Lleolir Twyni Tywod Ynyslas yng Ngheredigion, Cymru. Maent yn ffinio Bae Ceredigion ac aber Afon Dyfi (rhwng Ynyslas ac Aberdyfi, Gwynedd. Mae'r twyni (neu'r "tywynnau" hyn) yn rhan o Warchodfa Natur Genedlaethol Dyfi.

Bywyd gwyllt

Mae'r rhywogaethau canlynol i'w canfod yng nghynefin llwm y twyni: madfall Lacerta vivipara, y ffwlbart, cwningod, a llyg. Clywir yr Ehedydd, Corhedydd y Waun (Anthus pratensis) a'r Cwtiad Torchog yn canu uwch y tywod a gwelir sawl math o löyn byw gan gynnwys y Britheg werdd, Gweirlöyn y perthi a gwyfyn o'r enw Teigr ôl-adain goch.

Coedwig y Borth

Ar y traeth rhwng y Borth ac Ynyslas, pan fo'r môr ar drai, gellir gweld boncyffion hen goed sy'n profi fod tir yn gorwedd i'r gorllewin yn y gorffennol, cyn iddo gael ei foddi gan y môr ar ddiwedd y cyfnod Mesolithig. Yn Ionawr 2014, oherwydd y gwyntoedd cryfion dadorchuddiwyd rhagor o'r bonion coed pan gliriwyd llawer o'r tywod; ymhlith y gwahanol fathau o goed roedd: y binwydden, y wernen, y dderwen a'r fedwen. Gorwedda'r bonion hyn mewn mawn. Dyddiwyd y coed drwy garbon-ddyddio a cheir tystiolaeth eu bod rhwng 4,500 a 6,000 oed. Mae'r bonion yn ymestyn am tua dwy filltir a hanner.

Dyma un rheswm, mae'n debyg, am y chwedl gyfarwydd am Gantre'r Gwaelod, a gysylltir ag ardal Aberdyfi sydd ar yr ochr arall i'r afon, i'r gogledd.

Aberdyfi o Dwyni Tywod Ynyslas, Ebrill 2011

Twyni Tywod Ynyslas, Gorffennaf 2008

Teigr ôl-adain goch, a welir yn y twyni

Gweler hefyd

• Twyni Mwd Aber Dyfi
• Cors Fochno

Dolennau allanol

• BBC Archifwyd 2012-01-03 yn y Peiriant Wayback.
• Y Borth Archifwyd 2013-07-02 yn y Peiriant Wayback.