Eirlys Britton
| Eirlys Britton | |
|---|---|
| Ganwyd | 1949  Caerdydd |
| Dinasyddiaeth |  Cymru |
| Alma mater | |
| Galwedigaeth | actor |
Actores ac athrawes Gymraeg yw Eirlys Britton (ganwyd 1949). Mae'n adnabyddus am chwarae Beth yn Pobol y Cwm.
Bywyd cynnar[golygu | golygu cod]
Cafodd ei geni yng Nghaerdydd. Mae'n chwaer i Charli Britton, cyn-ddrymiwr Edward H Dafis. Roedd yn un o ddisgyblion cyntaf Ysgol Gyfun Rhydfelen, Pontypridd a graddiodd mewn Drama o Goleg y Drindod, Caerfyrddin.[1]
Gyrfa[golygu | golygu cod]
Bu'n athrawes yn Ysgol Heol y Celyn ger Pontypridd. Yn 1980 sefydlodd Dawnswyr Nantgarw gyda chydweithwyr a staff yr ysgol ac ers hynny bu'n rhoi ei amser fel hyfforddwraig dawnsio gwerin. Yn Eisteddfod 2005 derbyniwyd hi a'i gŵr i Orsedd y Beirdd yn Urdd Derwydd er Anrhydedd am eu cyfraniad aruthrol a nodedig i hyrwyddo dawnsio gwerin.[2] Derbyniodd Fedal Goffa Syr T H Parry-Williams yn Eisteddfod Genedlaethol Cymru Bro Morgannwg 2012 am ei chyfraniad gwirfoddol yn ardal Pontypridd, yn enwedig wrth weithio gyda phobl ifanc.
Yn y 1990au gadawodd ddysgu llawn amser i bortreadu Beth James (Leyshon gynt) yn Pobol y Cwm am ddeng mlynedd rhwng 1994 a 2004.[1]. Ymddangosodd yn y ffilm Yn Gymysg Oll i Gyd ac roedd yn chwarae Pegi, mam y prif gymeriad yn y ddrama boblogaidd i bobl ifanc, Pam Fi Duw?. Yn 2016, ymddangosodd yn y ddrama wleidyddol Byw Celwydd.
Dawnsio Gwerin[golygu | golygu cod]
Mae Eirlys Britton hefyd yn adnabyddus am ei diddordeb mewn dawnsio gwerin Cymreig. Bu'n aelod o Cwmni Dawns Werin Caerdydd ac, yna yn 1980 pan oedd yn athrawes yn Ysgol Heol y Celyn, Pontypridd, sefydlodd Dawnswyr Nantgarw.
Bywyd personol[golygu | golygu cod]
Mae'n briod a Cliff Jones, cyfarwyddwr a chynhyrchydd teledu.[3]
Cyfeiriadau[golygu | golygu cod]
- ↑ 1.0 1.1 Anrhydeddu'r hyfforddwraig dawnsio gwerin, Eirlys Britton , BBC Cymru Fyw, 16 Ebrill 2012.
- ↑ I'w derbyn i'r Orsedd 2005. BBC Cymru (1 Gorffennaf 2005). Adalwyd ar 1 Chwefror 2016.
- ↑ Adran Urdd Bro Taf - Athrawon. Adalwyd ar 1 Chwefror 2016.
Dolenni allanol[golygu | golygu cod]
- Eirlys Britton ar wefan yr Internet Movie Database