Annette Bryn Parri

Annette Bryn Parri
Annette Bryn Parri
Ganwyd	29 Gorffennaf 1962
Bu farw	27 Mai 2025 ; Bangor
Dinasyddiaeth	Cymru
Alma mater	Coleg Cerdd Brenhinol y Gogledd ;
Galwedigaeth	cyfeilydd, cyfansoddwr, pianydd
Cyflogwr	Prifysgol Cymru ;

Cyfeilyddes, cerddor, cyfansoddwraig a pherfformwraig oedd Annette Bryn Parri (29 Gorffennaf 1962 – 27 Mai 2025).^[1]^[2] Roedd yn adnabyddus fel pianydd a chyfeilydd i sawl artist yn cynnwys Bryn Terfel, Hogia’r Wyddfa, Ysgol Glanaethwy, Rebecca Evans a Rhys Meirion.

Bywyd cynnar ac addysg

Fe'i ganed yn Neiniolen, Gwynedd. Ddechreuodd ar ei gyrfa gerddorol yn ifanc, gan berfformio gyda'i chwiorydd Marina ac Olwen, o dan yr enw Genod Tŷ'r Ysgol. Yn bymtheng mlwydd oed, roedd Annette yn gyfeilydd swyddogol.

Wedi iddi astudio’r piano gyda Rhiannon Gabrielson o Benmaenmawr aeth ymlaen i astudio gyda Marjorie Clement yng Ngholeg Cerdd Brenhinol y Gogledd ym Manceinion, lle graddiodd yn 1984. Wrth gyfeilio yn y brifysgl, roedd Annette yn arbenigo mewn Lieder, oratorio a’r opera, ond roedd ei diddordeb mwyaf yng nghyfansoddwyr y cyfnod Rhamantaidd.

Yn 1982 enillodd wobr Grace Williams am gyfansoddi yn Eisteddfod yr Urdd ym Mhwllheli. Yn 1983, cafodd ei gweld am y tro cyntaf ar lwyfan Eisteddfod Genedlaethol yn Llangefni. Enillodd y Rhuban Glas offerynnol yn Eisteddfod Genedlaethol Cymru Y Rhyl yn 1985.

Gyrfa

Yn 1984 ymunodd a’r Adran Gerdd ym Mhrifysgol Cymru Bangor, ac o'r flwyddyn honno ymlaen, bu Annette yn diwtor piano i fyfyrwyr cerddoriaeth sy’n dilyn cyrsiau B.A. a B.Cerdd a bu’n cyfeilio i fyfyrwyr yn eu harholiadau perfformio.

Bu'n cyfeilio i nifer o brif artistiaid Cymru fel Bryn Terfel ac Aled Jones, Eirian James, Gwyn Hughes-Jones, Leah Marian Jones a Rebecca Evans. Cyfrannodd i nifer o gynyrchiadau teledu fel Noson Lawen, Cân i Gymru. Meistroli, a llawer mwy. Mae ei chyfansoddiadau yn cynnwys ei threfniant o ganeuon Andrew Lloyd Webber, caneuon Cymreig a melodïau amrywiol, cerddoriaeth i ffilm a cherddoriaeth ysgafn.

Ymddangosodd mewn cyngherddau, fel perfformwraig ac fel cyfeilyddes trwy Gymru a Lloegr, yn ogystal ag yn yr Almaen, Llydaw, yr Eidal, Nigeria, Awstralia a Hong Cong - ac ar fwrdd y QE2. Roedd wedi cyfeilio yn Neuadd Albert, Llundain ar sawl achlysur, a bu Syr Andrew Lloyd Webber, Syr George Solti, y Tywysog Charles a’r diweddar Dywysoges Diana ymhlith ei chynulleidfaoedd preifat.

Ers 1993 roedd yn brif gyfeilydd i gorau Ysgol Glanaethwy ym Mangor, ac rhwng 2002 a 2011 bu’n Gyfarwyddwr Cerdd Côr Meibion y Traeth. Cyhoeddodd ei hunangofiant Bywyd ar Ddu a Gwyn yn 2010.

Rhwng 1995 a 1997, ac wedyn yn 2005, cyd-gyfansoddodd a bu'n gyfarwyddwr cerdd ar ddramâu cerdd Gŵyl Fai Pwllheli gyda Glyn Roberts a Paul Griffiths.

Yn 2013 sefydlodd TRIO, triawd lleisiol yn cynnwys ei mab Bedwyr, yn ogystal â Steffan Lloyd Owen ac Emyr Gibson. Yr un flwyddyn cafodd ei hurddo i Orsedd yr Eisteddfod Genedlaethol. Bu'n perfformio am ugain mlynedd gyda'r telynor Dylan Cernyw fel y ddeuawd 'Piantel'. Roedd hi hefyd yn Gyfarwyddwr Cerdd Côr Heddlu Gogledd Cymru.^[3]

Bywyd personol

Roedd hi'n briod a'r diweddar Gwyn Parri a ganwyd tri o blant iddynt - Heledd, Ynyr a Bedwyr.^[4] Bu farw yn Ysbyty Gwynedd ar 27 Mai 2025, yn 62 mlwydd oed ac yn dilyn cyfnod o waeledd.^[5]^[2]

Teyrngedau

Talwyd terngedau iddi gan lawer gyda'r newyddion yn dod yn ystod wythnos Eisteddfod yr Urdd. Magwyd Trystan Ellis-Morris yn yr un pentref, Deiniolen. Tra'n cyflwyno rhaglenni teledu yr Eisteddfod ar S4C dywedodd "Mae hi wedi ysbrydoli gymaint o gerddorion ifanc dros y blynyddoedd... Mae'r cyfraniad mae hi 'di gneud yn anfesuradwy mewn gwirionedd. Mae'r llu atgofion yn rhai bendigedig,".

Dywedodd Meinir Jones Parry oedd yn cyfeilio ar lwyfan yr Urdd: "Tristwch mawr clywed y newyddion am Annette Bryn Parri. Person hynod dalentog ac annwyl. Wedi cael y fraint o fod yn ei chwmni a rhannu llwyfan gyda hi dros y blynyddoedd."

Dywedodd Dylan Cernyw : "Anodd credu y newyddion bore ‘ma, ffrind, cerddor, ac fel chwaer, Annette.... Fy ffrind gore, cyd-berfformiwr, ers dros ugain mlynedd, ac yn gyd gyfeilydd i wahanol gorau ac unawdwyr ers blynyddoedd maith, un o'r goreuon! Pleser oedd dy nabod, y chwerthin, y crio a dy hiwmor."

Englyn coffa gan Annes Glynn

Annette fu'n cyfeiliant ni ar y daith;

aur y dôn, a'i hasbri

telynegol, hudol hi

yw'r ias fydd yn goroesi.^[6]

Rhestr recordiadau

Dyma restr o ganeuon gan Annette Bryn Parri. Nid yw'r rhestr yn orffenedig, ac mae'r ffeiliau yn dameidiau i aros pryd, sef y 30 eiliad cyntaf o'r traciau a recordiwyd ar label Cwmni Recordiau Sain.^[7]

Teitl y gân	Blwyddyn cyhoeddi	Rhif Catalog
Bugeilio'r Gwenith Gwyn	2005	SAIN SCD 2368
El Cumbanchero	2005	SAIN SCD 2368
Hwiangerdd a Breuddwydion	2005	SAIN SCD 2368
Il Spirto Gentil	2005	SAIN SCD 2368
La Vergine	2005	SAIN SCD 2368
Le Coucou	2005	SAIN SCD 2368
Moonlight Sonata	2005	SAIN SCD 2368
Oh Holy Night	2005	SAIN SCD 2368
Prelude yn C Leiaf	2005	SAIN SCD 2368
Rhapsody in Blue	2005	SAIN SCD 2368
Romance de Amor	2005	SAIN SCD 2368
Tarantelle	2005	SAIN SCD 2368
Toccata yn D Leiaf	2005	SAIN SCD 2368
Un Mondo a Parte	2005	SAIN SCD 2368
Moonlight Sonata	2009	SAIN SCD 2558