Baileys

Baileys

Enghraifft o'r canlynol	nod masnach, alcohol brand
Math	Gwirodlyn, Hufen Gwyddelig
Crëwr	Tom Jago
Gwlad	Gweriniaeth Iwerddon
Dechrau/Sefydlu	1974
Yn cynnwys	Wisgi, llaeth
Gwneuthurwr	Diageo
Dosbarthydd	Diageo
Gwefan	http://www.baileys.com
Ffeiliau perthnasol ar Gomin Wicimedia

Baileys

Math	nod masnach
Sefydlwyd	1974
Gwefan	http://www.baileys.com

Mae Hufen Gwyddelig Baileys yn wirodlyn sy'n seiliedig ar wisgi Gwyddelig a hufen. Mae'n cael ei gynhyrchu gan gwmni Diageo yn Nangor Road, Dulyn, Iwerddon ac yn Mallusk, Gogledd Iwerddon sy'n eiddo i gwmni Gilbeys of Ireland, mae'r nod masnach yn eiddo i Diageo. Mae ganddo gynnwys alcohol datganedig o 17% yn ôl cyfaint.

Hanes a tharddiad

Crëwyd Hufen Gwyddelig Baileys gan Tom Jago o gwmni Gilbeys of Ireland, adran o gwmni Distillers a Vintners International, gan ei fod yn chwilio am rywbeth i'w gyflwyno i'r farchnad ryngwladol. Dechreuodd y broses o ddod o hyd i gynnyrch ym 1971 ac fe'i cyflwynwyd ym 1974 fel yr Hufen Gwyddelig cyntaf i'w gwerthu'n fasnachol. Enwyd y ddiod ar ôl Gwesty Bailey's yn Llundain a chafwyd caniatâd gan berchenogion y gwesty i ddefnyddio'r enw heb yr atalnod.

Cynhyrchu

Mae gwisgi Gwyddelig a hufen o wahanol ddistyllwyr yn cael eu homogenu i ffurfio emylsiwn gyda chymorth emylsydd sy'n cynnwys olew llysiau wedi'i mireinio. Mae'r broses yn atal gwahanu'r alcohol a'r hufen yn ystod storio. Mae Baileys yn cynnwys rysáit dethol coco perchnogol sy'n rhoi cymeriad a rhinflas siocled i'r ddiod. Ni wyddys faint o gynhwysion eraill sydd ond maent yn cynnwys perlysiau a siwgr.

Daw'r hufen a ddefnyddir yn y ddiod o Glanbia, cwmni llaeth Gwyddelig sydd yn cynhyrchu llaeth powdr a hufen ffres yn ei ffatri yn Swydd Cavana. Dyma'r prif gyflenwr hufen i Baileys ers dros ddeng mlynedd ar hugain. Ar adegau prysur y flwyddyn, bydd Glanbia hefyd yn cyflenwi hufen o'i ffatri yn Ballyragget Swydd Kilkenny.

Storio a bywyd silff

Yn ôl y gwneuthurwr, nid oes angen cynnwys cadwolion yn rysáit Bailys gan fod y cynnwys alcohol yn cadw'r hufen yn ffres.

Mae'r gwneuthurwr yn honni bod gan Baileys bywyd silff o 24 mis ac mae'n gwarantu ei flas am ddwy flynedd o'r diwrnod y cafodd ei gynhyrchu, hyd yn oed mewn potel sydd wedi ei hagor cyn belled â'i bod wedi ei gadw mewn oergell i ffwrdd o olau haul uniongyrchol ar dymheredd rhwng 0 a 25 °C (32 a 77 °F).

Gwerthoedd maeth

Mae Diageo yn darparu gwybodaeth faeth canlynol ar gyfer Baileys. Gwerthoedd fesul 100 ml:

Braster 14 g

Carbohydrad 24 g

Protein 3 g

Ynni 1345 kJ (327 kcal)

Blasau amgen

Yn 2003, lansiodd Bailey & Co. Baileys Glide, wedi'i anelu at y farchnad alcopop. Rhoddwyd gorau i'w cynhyrchu yn 2006.

Yn 2005, lansiodd Baileys amrywiadau Siocled Mintys a Crème Caramel. Fe'i rhyddhawyd yn wreiddiol ym meysydd awyr y Deyrnas Unedig ac yna fe'i rhyddhawyd ar gyfer marchnadoedd mawr yn y DU, yr Unol Daleithiau, Awstralia a Chanada yn 2006. Wedi llwyddiant y blasau amgen blaenorol cynhyrchwyd blasau newydd eto yn 2008, sef un blas coffi ac yn 2010 cynhyrchwyd un a blas cnau cyll. Treialodd y cwmni fersiwn premiwm newydd, Baileys Gold, mewn sawl maes awyr Ewropeaidd yn 2009. Cafodd Baileys Gold hefyd ei farchnata'n gryf ar gyfer cwsmeriaid o Japan. Ychwanegiadau diweddaraf i deulu blas Baileys yw Biscotti, a lansiwyd yn 2011, a chynnyrch premiwm Baileys Chocolat Luxe, a gyfunodd siocled Gwlad Belg gyda Baileys, yn 2013. Rhyddhaodd y cwmni amrywiaeth fanila a sinamon yn yr Unol Daleithiau yn 2013 gyda blasau pellach Sbeis Pwmpen, Espresso a Charamel Hallt y flwyddyn ganlynol. Yn 2017, crewyd Baileys Almande sydd yn addas at gwsmeriaid fegan. Yn 2018 daeth Baileys blas Mefus a Hufen i'r farchnad.