Número

Oddi ar Wicipedia
Jump to navigation Jump to search
Clawr y pumed rhifyn o Número (Tachwedd–Rhagfyr 1949).

Cylchgrawn llenyddol Sbaeneg a gyhoeddwyd yn Wrwgwái yn y cyfnodau 1949–55 a 1963–64 oedd Número. Cysylltir â La Generación del 45, y genhedlaeth a flodeuai yn llên Wrwgwái yng nghanol yr 20g. Roedd y cylchgrawn yn nodedig am ei fydolwg cosmopolitanaidd a'i ymdriniaeth â syniadau a mudiadau celf cyfoes.[1]

Sefydlwyd Número gan Emir Rodríguez Monegal, Idea Vilariño, a Manuel Claps, ac yn ddiweddarach ymunodd Mario Benedetti â'r fenter. Cyhoeddwyd cyfieithiadau o waith T. S. Eliot, Harold Pinter, a Raymond Queneau yn y cylchgrawn, yn ogystal ag ysgrifeniadau gwreiddiol gan Jorge Luis Borges, Manuel Rojas, Ernesto Sabato, Alfonso Reyes, ac Adolfo Bioy Casares.[1]

Dan olygyddiaeth Carlos Martínez Moreno, canolbwyntiodd ail gyfres Número yn y 1960au ar lên a diwylliant deallusol American Ladin. Ymddiswyddodd Vilariño o'r cylchgrawn oherwydd safbwynt anwleidyddol y golygyddion. Ymddiswyddodd rhagor o aelodau'r bwrdd golygyddol wedi i Rodríguez Monegal ddatgan ei wrthwynebiad i Chwyldro Ciwba, a gwrthodasant y cynnig gan grŵp gwrth-gomiwnyddol y Congress for Cultural Freedom i gymryd y busnes drosodd.[1]

Cyfarfod y cylchgrawn Número yng nghartref Emir Rodríguez Monegal. O'r chwith i'r dde, yn sefyll: Rodríguez Monegal, Zoraida Mébot, Manuel Claps, Idea Vilariño, Luz López, Baíta Sureda; yn eistedd: Sarandy Cabrera a Mario Benedetti.

Cyfeiriadau[golygu | golygu cod y dudalen]

  1. 1.0 1.1 1.2 Norah Giraldi Dei Cas, "Número" yn Encyclopedia of Latin American and Caribbean Literature 1900–2003, golygwyd gan Daniel Balderston a Mike Gonzalez (Llundain; Routledge, 2004), t. 391.