Cymdeithas Ddaearyddol Rwsia

Oddi ar Wicipedia
Jump to navigation Jump to search
Здание русского географического общества.jpg
Logo of the Russian Geographical Society.jpg
Data cyffredinol
Enghraifft o'r canlynolgeographical society, adeilad, sefydliad anllywodraethol Edit this on Wikidata
Dechrau/Sefydlu6 Awst 1845 (yn y Calendr IwliaiddEdit this on Wikidata
Aelod o'r  canlynolInternational Geographical Union Edit this on Wikidata
PencadlysSt Petersburg, Grivtsova Lane, Novaya Square Edit this on Wikidata
GwladwriaethYmerodraeth Rwsia, Yr Undeb Sofietaidd, Rwsia Edit this on Wikidata
RhanbarthSt Petersburg Edit this on Wikidata
Gwefanhttp://www.rgo.ru Edit this on Wikidata
Tudalen Comin Ffeiliau perthnasol ar Gomin Wicimedia
Vladimir Putin, Arlywydd Rwsia, yn annerch cyfarfod o fwrdd ymddiriedolwyr Cymdeithas Ddaearyddol Rwsia yn 2015.

Cymdeithas ddysgedig i ddaearyddwyr yn Ffederasiwn Rwsia yw Cymdeithas Ddaearyddol Rwsia (Rwseg: Ру́сское географи́ческое о́бщество; «РГО»). Lleolir ei phencadlys yn St Petersburg (cynt Petrograd, Leningrad).

Sefydlwyd yn 1845 dan yr enw Cymdeithas Ddaearyddol Ymerodraeth Rwsia, dan orchymyn y Tsar Niclas I. Adeg Chwyldro Rwsia yn 1917, roedd gan y gymdeithas 11 o is-adrannau a 1,000 o aelodau. Fe'i ailenwyd yn Gymdeithas Ddaearyddol Rwsia yn 1917, yn Gymdeithas Ddaearyddol y Wladwriaeth yn 1926, ac yn Gymdeithas Ddaearyddol yr Undeb Sofietaidd yn 1938. Dychwelodd at yr enw Cymdeithas Ddaearyddol Rwsia yn 1991.[1]

Cynyddodd aelodaeth y Gymdeithas Ddaearyddol i 19,000 erbyn 1971, a buont yn danfon cynrychiolwyr i'r Gyngres Ddaearyddol Holl-Sofietaidd bob pum mlynedd. Yn y cyfnod rhwng cynnal y cyngresau, gweinyddwyd y gymdeithas gan bwyllgor gwyddonol a etholwyd gan ddirprwyon y gyngres, dan arweiniad llywydd y presidiwm. Ymhlith y llywyddion bu'r eigionegwr Yuly Shokalsky, y botanegydd a genetegydd Nikolai Vavilov, y daearyddwr a physgodegwr Lev Berg, y söolegydd Yevgeny Pavlovsky, a'r rhewlifegydd Stanislav Kalesnik. Bu'r ganolfan yn St Petersburg yn goruchwylio 15 o gymdeithasau cysylltiedig yng Ngweriniaeth Sofietaidd Ffederal Sosialaidd Rwsia, 14 o gymdeithasau yng ngweriniaethau eraill yr Undeb Sofietaidd, a rhyw 100 o is-ganghennau.[1]

Rhwng 1947 a 1991, ymgynnulliwyd nifer o gynadleddau gwyddonol gan y Gymdeithas Ddaearyddol, yn ogystal â'r Cyngresau Holl-Sofietaidd yn Leningrad, Moscfa, Kiev, Tbilisi, a dinasoedd eraill,. Trafodwyd mwy na 60,000 o erthyglau a phapurau gwyddonol dan ei hawdurdod, ac anogwyd ei haelodau i gyhoeddi ymchwil mewn cyfarfodydd cyhoeddus. Cyhoeddwyd cyfnodolion academaidd gan ryw 50 o'r cymdeithasau cysylltiedig, gan gynnwys Voprosy geografi ("Problemau daearyddiaeth") a gyhoeddir ym Moscfa ers 1946. Bu'r gymdeithas hefyd yn darparu gwybodaeth a chyngor arbenigol i lywodraeth yr Undeb Sofietaidd ynghylch materion daearyddol a datblygiad rhanbarthol, ac yn trefnu neu yn noddi rhwng 20 a 50 o alldeithiau bob blwyddyn.[1]

Yn sgil cwymp yr Undeb Sofietaidd, crebachodd aelodaeth y Gymdeithas Ddaearyddol ac erbyn 2003 dim ond rhyw fil o aelodau oedd ganddi.[1] Llywydd y gymdeithas ers 2009 yw Sergey Shoygu, Gweinidog Amddiffyn Rwsia.[2]

Cyfeiriadau[golygu | golygu cod y dudalen]

  1. 1.0 1.1 1.2 1.3 Victor L. Mote, "Russian Geographical Society" yn Encyclopedia of Russian History, golygwyd gan James R. Millar et al. (Efrog Newydd: Macmillan, 2004), tt. 1317–18.
  2. (Saesneg) "The Society", Cymdeithas Ddaearyddol Rwsia. Adalwyd ar 15 Chwefror 2020.

Dolen allanol[golygu | golygu cod y dudalen]