Arfon Griffiths

Oddi ar Wicipedia
Jump to navigation Jump to search
Arfon Griffiths
Gwybodaeth Bersonol
Enw llawnArfon Trevor Griffiths
Dyddiad geni (1941-08-23) 23 Awst 1941 (78 oed)
Man geniWrecsam, Cymru
SafleCanol Cae
Gyrfa Ieuenctid
1957–1959Wrecsam
Gyrfa Lawn*
BlwyddynTîmYmdd(Gôl)
1959–1961Wrecsam41(8)
1961–1962Arsenal15(2)
1962–1979Wrecsam550(112)
1975Seattle Sounders
(benthyg)
15(1)
Cyfanswm621(123)
Tîm Cenedlaethol
1971–1976Cymru17(6)
Timau a Reolwyd
1977–1981Wrecsam
1981–1982Crewe Alexandra
* Cyfrifir yn unig: ymddangosiadau i Glybiau fel oedolyn a goliau domestg a sgoriwyd..
† Ymddangosiadau (Goliau).

Cyn bêl-droediwr Cymreig ydy Arfon Trevor Griffiths MBE[1] (ganwyd 23 Awst 1941). Rhwng 1959 a 1979 chwaraeodd dros Wrecsam, Arsenal a Chymru cyn mynd ymlaen i reoli Wrecsam a Crewe Alexandra.

Gyrfa Chwarae[golygu | golygu cod y dudalen]

Gwrthododd Griffiths gyfle i fynd ar dreial gyda Lerpwl a Sheffield Wednesday er mwyn arwyddo fel amatur â Wrecsam ym mis Mai 1957[2].

Gwnaeth ei ymddangosiad cyntaf i'r tîm cyntaf yn erbyn Darlington yng Nghwpan FA Lloegr ym mis Tachwedd 1958[3], ac roedd yn aelod o dîm ieuenctid y clwb pan lwyddodd i ennill Cwpan Ieuenctid Cymru. Bu rhaid iddo ddisgwyl hyd nes y Tachwedd canlynol i chwarae i'r tîm cyntaf am yr ail dro, a hynny mewn gêm Gynghrair yn erbyn Reading gan gadw ei le yn y tîm am weddill y tymor a chodi Cwpan Cymru wrth i Wrecsam drechu Caerdydd yn y rownd derfynol.

Ym mis Chwefror 1961 talodd Arsenal £15,500 amdano a gwnaeth ei ymddangosiad cyntaf gan golli 5-1 yn erbyn Wolverhampton Wanderers ar 22 Ebrill 1961[4]. Sgoriodd ddwywaith mewn 15 ymddangosiad i Arsenal cyn cael ei werthu yn ôl i Wrecsam am £8,000[3].

Llwyddodd i arwain Wrecsam i ddyrchafiad ym 1961-62 a 1969-70 yn ogystal â chodi Cwpan Cymru ar bedair achlysur ac roedd yn aelod allweddol o'r tîm gan lwyddo i gyrraedd rownd yr wyth olaf o Gwpan Enillwyr Cwpanau Ewrop ym 1975-76 cyn colli yn erbyn RSC Anderlecht. Gwnaeth 591 ymddangosiad yn y Gynghrair i Wrecsam, sy'n record i'r clwb, a sgoriodd 120 o goliau.

Gyrfa Rhyngwladol[golygu | golygu cod y dudalen]

Er iddo chwarae yn Nhrydedd Adran y Gynghrair, cafodd Griffiths ei alw i garfan Cymru ym 1971 gan ennill ei gap cyntaf fel eilydd yn erbyn Tsiecoslofacia[5] yng ngemau rhagbrofol Euro 1972.

Er mynd ar daith Cymru i Tahiti, Seland Newydd a Maleisia ym 1971[3][6] ni chafodd ei ail gap tan gemau rhagbrofol Euro 1976 lle roedd yn aelod allweddol o'r tîm pan lwyddodd i gyrraedd rownd yr wyth olaf.

Gyrfa Rheoli[golygu | golygu cod y dudalen]

Wrecsam[golygu | golygu cod y dudalen]

Wedi chwarae o dan wyth rheolwr gwahanol yn Wrecsam, cymerodd Griffiths yr awenau yn ei ddwylo'i hun ym mis Mai 1977 yn dilyn ymddiswyddiad John Neal[3][7]. Llwyddodd i arwain Wrecsam i bencampwriaeth y Drydedd Adran ym 1977-78 a dod y rheolwr cyntaf yn hanes y clwb i sicrhau dyrchafiad i Ail Adran y Gynghrair Bêl-droed.

Ar 13 Mai 1981 ymddiswyddodd Griffiths yn dilyn anghydfod gyda bwrdd y clwb pêl-droed. Roedd y clwb wedi dweud wrth Griffiths bod raid iddo dorri'n ôl ar ei staff ac ar y tîm ieuenctid ond fe wrthododd wneud hynny a gadawodd y clwb[3].

Crewe Alexandra[golygu | golygu cod y dudalen]

Cafodd ei benodi'n rheolwr ar Crewe Alexandra ym mis Awst 1981 gan dreulio tymor gyda'r clwb cyn ymddiswyddo ar 25 Hydref 1982.

Gwobrau[golygu | golygu cod y dudalen]

Ym 1975 cafodd Griffiths ei urddo â gwobr Personoliaeth Chwaraeon Cymreig y Flwyddyn BBC Cymru[8] ac ym 1976 cafodd yr MBE am ei wasnaeth i bêl-droed Cymreig ac mae hefyd yn aelod o Oriel Anfarwolion Wrecsam[9].

Cyfeiriadau[golygu | golygu cod y dudalen]

  1. "Arsenal History: Arfon Griffiths". Arsenal.com. Unknown parameter |published= ignored (help)
  2. "Dedication to Wrexham came at a cost to Arfon". Daily Post. 2008-07-14. Unknown parameter |published= ignored (help)
  3. 3.0 3.1 3.2 3.3 3.4 Peter Jones a Gareth M. Davies (1999). The Racecourse Robins: Adams To Youds. ISBN 0-952495-01-5.
  4. "Arsenal v Wolverhampton Wanderers, 22 Abrill 1961". 11v11. Unknown parameter |published= ignored (help)
  5. Gareth M. Davies ac Ian Garland (1991). Who's Who of Welsh International Soccer Players. ISBN 1-872424-11-2.
  6. "Non-cap international matches". Welsh Football Online. Unknown parameter |published= ignored (help)
  7. Ian Gwyn Hughes (2008-04-28). "The rise and fall of Wrexham". BBC Sport. Unknown parameter |published= ignored (help)
  8. "BBC Wales Sport Personality winners". BBC Sport. Unknown parameter |published= ignored (help)
  9. "Wrexham AFC Hall of Fame". Wrexham AFC. Unknown parameter |published= ignored (help)
Rhagflaenydd:
Gareth Edwards
Personoliaeth Chwaraeon Cymreig y Flwyddyn BBC Cymru
1976
Olynydd:
Mervyn Davies a thîm Camp Lawn Cymru