Ralph Abernathy
| Ralph Abernathy | |
|---|---|
 Ralph Abernathy ym Mehefin 1968. | |
| Ganwyd | 11 Mawrth 1926, 21 Mawrth 1926  Linden, Alabama |
| Bu farw | 17 Ebrill 1990 Atlanta |
| Dinasyddiaeth | Unol Daleithiau America |
| Alma mater |
|
| Galwedigaeth | ymgyrchydd hawliau sifil, gweinidog yr Efengyl, gwleidydd, diwinydd, amddiffynnwr hawliau dynol |
| Plaid Wleidyddol | plaid Ddemocrataidd |
| Priod | Juanita Abernathy |
| Plant | Donzaleigh Abernathy, Ralph David Abernathy III |
Gweinidog Bedyddwyr Americanaidd ac un o arweinwyr y mudiad dros hawliau sifil i'r Americanwyr Affricanaidd oedd Ralph David Abernathy (11 Mawrth 1926 – 17 Ebrill 1990) a fu'n brif gynorthwywr Martin Luther King.
Ganed yn Linden, Alabama, a ffermwr oedd ei dad. Cafodd ei ordeinio'n weinidog yn Eglwys y Bedyddwyr ym 1948. Derbyniodd ei radd baglor mewn mathemateg o Brifysgol Daleithiol Alabama ym 1950, ac enillodd radd meistr mewn cymdeithaseg o Brifysgol Atlanta ym 1951.[1] Y flwyddyn honno, symudodd i Montgomery, Alabama, i fugeilio Eglwys Gyntaf y Bedyddwyr, ac yno cyfarfu â Martin Luther King a benodwyd yn weinidog ar eglwys arall yn y ddinas ychydig o flynyddoedd yn hwyrach. Ym 1955–56 cyd-drefnwyd boicot y bysiau ym Montgomery gan King ac Abernathy, ac arweiniai at dadarwahanu'r bysiau.
Ym 1957 sefydlwyd y Southern Christian Leadership Conference (SCLC) gyda King yn llywydd ac Abernathy yn ysgrifennydd-drysorydd. Ymsefydlodd Abernathy yn Atlanta, Georgia, ym 1961 i weinidogaethu, ac yn ddiweddarach y flwyddyn honno fe'i dyrchafwyd yn is-lywydd yr SCLC. Yn sgil llofruddiaeth King ym 1968, fe'i olynwyd yn llywydd yr SCLC gan Abernathy. Arweiniodd yr SCLC nes iddo ymddiswyddo ym 1977 a dychwelodd i weinidogaethu Eglwys y Bedyddwyr yn Atlanta.[1]
Cyhoeddwyd ei hunangofiant, And the Walls Came Tumbling Down, ym 1989. Bu farw o drawiad ar y galon yn yr ysbyty yn Atlanta yn 64 oed.[2]
Cyfeiriadau[golygu | golygu cod]
- ↑ 1.0 1.1 (Saesneg) Ralph David Abernathy. Encyclopædia Britannica. Adalwyd ar 17 Mehefin 2021.
- ↑ (Saesneg) Bart Barnes, "Ralph Abernathy dies at 64", The Washington Post (18 Ebrill 1990). Archifwyd o'r dudalen we wreiddiol drwy gyfrwng archive.is ar 17 Mehefin 2021.