J. O. Roberts

J. O. Roberts
Ganwyd	John Owen Roberts 17 Ionawr 1932  Lerpwl
Bu farw	19 Gorffennaf 2016  Benllech
Dinasyddiaeth	Cymru
Galwedigaeth	actor, athro
Plant	Nia Roberts a Gareth Roberts

Actor ac athro o Gymro oedd John Owen Roberts, a adwaenid fel J. O. Roberts (17 Ionawr 1932 – 19 Gorffennaf 2016). Cafodd ei hunangofiant, Ar Lwyfan Amser, ei ryddhau yn 2005 fel rhan o Gyfres y Cewri. Bu'n aelod blaenllaw o Gwmni Theatr Gwynedd o'i chreu ym 1986.

Bywyd cynnar

Ganed John Owen Roberts yn Lerpwl, ac ar ddechrau yr Ail Ryfel Byd, symudodd e a'i chwaer i fyw gyda'i nain a'u taid ar Ynys Môn. Cafodd rhan fwyaf o'i addysg ar yr ynys a dechreuodd ei ddiddordeb mewn drama yn y cyfnod hwn.

Gyrfa

Addysg

Yn y 1950au, dychwelodd i Lerpwl fel athro ond roedd ei ddiddordeb ym myd drama wedi cydio ac roedd wedi ymddangos mewn dramâu radio ac ar lwyfan yn barod. Aeth ymlaen i ddysgu yn Llannerch-y-medd a Bodffordd, cyn symud i adran ddrama'r Coleg Normal, Bangor.

Actor

deunydd marchnata y gyfres Lleifior

Dechreuodd actio gyda Theatr Fach Llangefni. Wedi ymddeol o'i swydd fel athro ar ddechrau'r 1980au, daeth J O Roberts yn wyneb cyfarwydd mewn dramâu teledu, ac ar lwyfan.

Ymddangosodd mewn nifer o ddramau a chyfresi teledu, yn eu plith - Hufen a Moch Bach (1983-1988), Mae Hi'n Wyllt Mr Borrow (1984), Cysgodion Gdansk (1987), Deryn, Talcen Caled. Chwaraeodd rhan Harri Vaughan yn Lleifior (1993-1995) - cyfres yn seiliedig ar lyfrau enwog Islwyn Ffowc Elis. Portreadodd Owain Glyn Dŵr yn y ffilm Owain Glyndŵr ym 1983, yn olrhain hanes y gwrthryfelwr.

Bywyd personol

Roedd yn briod a Mabel Ceridwen Owen, athrawes a ddysgodd yn Ysgol Gyfun Llangefni cyn ymddeol. Bu farw Mabel yn 56 mlwydd oed ar 6 Chwefror 1991, o ganser yr ofari. Cawsant ddau o blant - y gyflwynwraig Nia Roberts a'r cyflwynydd chwaraeon, Gareth Roberts.

Derbyniodd Gymrodoriaeth er Anrhydedd am wasanaeth i fyd y ddrama o Brifysgol Bangor ar 13 Gorffennaf 2016. Bu farw wythnos yn ddiweddarach yn ei gartref - Pengwern, Benllech ar Ynys Môn.

Cynhaliwyd angladd cyhoeddus ddydd Gwener 29 Gorffennaf gyda gwasanaeth yng Nghapel Paradwys, Llanallgo am 1yp.

Cynyrchiadau

(detholiad)

Theatr

Cwmni Theatr Gwynedd

• Enoc Huws
• Golff
• Ffrwd Ceinwen

Teledu a Ffilm

• Hufen a Moch Bach (1983-1988)
• Mae hi'n Wyllt Mr Borrow (1984)
• Cysgodion Gdansk (1987)
• Deryn
• Talcen Caled
• Lleifior (1993-1995)
• Owain Glyndŵr (1983)
• Jabas
• Jabas Jones (ffilm) (1990)
• Heliwr (1996)

Oriel

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•