Corfflu Deintyddol Brenhinol y Fyddin

Oddi ar Wicipedia
Jump to navigation Jump to search
Royal Army Dental Corps cap badge.gif
Data cyffredinol
Enghraifft o'r canlynolUned filwrol Edit this on Wikidata
Rhan oArmy Medical Services Edit this on Wikidata
Dechrau/Sefydlu1921 Edit this on Wikidata
Gwladwriaethy Deyrnas Unedig Edit this on Wikidata
Capten o Gorfflu Deintyddol Brenhinol y Fyddin wrth ei waith yng nghanol dinistr yr Ail Ryfel Byd yn Lanciano, yr Eidal, yn Rhagfyr 1943.

Corfflu yn y Fyddin Brydeinig yw Corfflu Deintyddol Brenhinol y Fyddin (Saesneg: Royal Army Dental Corps; RADC) sy'n darparu gwasanaethau deintyddol i aelodau'r Fyddin. Mae'r Corfflu yn rhan o Wasanaethau Meddygol y Fyddin. Mae swyddogion y Corfflu yn ddeintyddion llawfeddygol a'r rhengoedd eraill yn dechnegwyr ac yn gynorthwywyr llawfeddygol.[1]

Ffurfiwyd Corfflu Deintyddol y Fyddin (Saesneg: Army Dental Corps; ADC) ym 1921 gyda deintyddion o Gorfflu Meddygol Brenhinol y Fyddin. Ail-enwyd yn Gorfflu Deintyddol Brenhinol y Fyddin ym 1946.[2] Gwasanaethodd dros 2000 o aelodau'r Corfflu, neu fang-snatchers, yn ystod yr Ail Ryfel Byd.[1]

Am fwyafrif oes y Corfflu roedd ei bencadlys ar Evelyn Woods Road yn Aldershot, ond bellach fe'i leolir gyda gweddill Gwasanaethau Meddygol y Fyddin yn Camberley. Birgitte, Duges Caerloyw, yw Prif Gyrnol y Corfflu. Mae Cymdeithas Corfflu Deintyddol Brenhinol y Fyddin yn cynnal Penwythnos y Corfflu pob mis Medi yn Aldershot. Pan yn gorymdeithio mae aelodau'r Corfflu yn cludo cleddyfau a bidogau ond nid ydynt yn eu dwyn, i symboleiddio bod y Corfflu Deintyddol a'r Corfflu Meddygol yn dwyn arfau i amddiffyn eu hunain yn unig, yn unol â Chonfensiynau Genefa.[1]

Cyfansoddwyd yr ymdeithgan Green Facings ym 1953, a mabwysiadwyd gan y Corfflu ym 1954. Mae'r ymdeithgan hon yn seiliedig ar yr alawon Green Broom a Greensleeves, ac mae'r teitl yn dynodi gwisg y Corfflu.[1]

Gwisg[golygu | golygu cod y dudalen]

Glas gyda pheipiad a ffesin emrallt yw lliwiau gwisg Corfflu Deintyddol Brenhinol y Fyddin.[2] Mae capiau a gwregysau stabl ar gyfer gwasanaeth yn y maes yn emrallt, glas, a choch ceirios. Mae gwisg filwrol yr holl rengoedd yn cynnwys y cortyn gwddf gwyrdd ers 1952. Mae gan swyddogion a swyddogion gwarant jersis gwyrdd i wisgo yn y barics.[1]

Bathodyn cap[golygu | golygu cod y dudalen]

Mabwysiadwyd bathodyn cap y Corfflu ym 1948. Mae'n dangos pen draig, gyda chleddyf rhwng ei dannedd, o fewn coronbleth lawryf gydag arwyddair y Corfflu, Ex dentibus ensis (Lladin am "gleddyf o'r dannedd"). Ysbrydolwyd y ddelwedd hon gan stori Cadmus ym mytholeg Roeg: gwnaeth Cadmus ladd draig ac yna wnaeth hau dannedd y ddraig, ac o hynny tyfodd hil filwrol y Spartoí. Gwisgir y bathodyn ar gefnyn gwyrdd ar y beret.[1]

Gweler hefyd[golygu | golygu cod y dudalen]

Cyfeiriadau[golygu | golygu cod y dudalen]

  1. 1.0 1.1 1.2 1.3 1.4 1.5 Griffin, t. 170.
  2. 2.0 2.1 Chant, t. 292.

Ffynonellau[golygu | golygu cod y dudalen]

  • Chant, Christopher. The Handbook of British Regiments (Llundain, Routledge, 1988).
  • Griffin, P. D. Encyclopedia of Modern British Army Regiments (Thrupp, Sutton, 2006).

Dolenni allanol[golygu | golygu cod y dudalen]