Iaith ymasiadol

Oddi ar Wicipedia
Jump to navigation Jump to search

Math o iaith synthetig sy'n gwrthgyferbynnu gydag ieithoedd dodiadol gan ei thueddiad cryf i ymasio morffemau i mewn i'w gilydd yw iaith ymasiadol. Yr ieithoedd ymasiadol mwyaf amlwg yw'r ieithoedd Indo-Ewropeaidd.

Enghraifft da o forffemau wedi'u hymasio yw'r gair Lladin bonus, "da". Mae'r terfyniad -us yn gyfuniad o dri morffem wedi'u hymasio i'w gilydd; mae'r terfyniad yn amgodio'r genedl wrywaidd, y cyflwr goddrychol, a'r rhif unigol. Os bydd angen newid un o'r morffemau hyn, byddai angen defnyddio terfyniad arall.

Mae gan ieithoedd ymasiadol nifer o ffurfiau afreolaidd. Ni ddigwyddai hyn mewn iaith ddodiadol gan fod pob elfen synthetig yn cadw ystyr ei hun. Fe gredir bod ieithoedd ymasiadol yn tarddu o ieithoedd dodiadol er nad oes tystiolaeth o iaith yn ymasio morffemau glynedig i gadarnhau hyn. Ar y llaw arall mae ieithoedd ymasiadol yn dueddol o golli eu ffurfdroadau dros y canrifoedd. Mae rhai ieithoedd yn gwneud hyn yn gyflymach nag eraill [1], er enghraifft, mae'r ieithoedd Slafonig bron mor ymasiadol â Phroto-Indo-Ewropeg ond mae Saesneg ac Afrikaans bron yn ddadelfennol.

Nodwedd arall o ieithoedd ymasiadol yw eu system o ogwyddiadau. Er enghraifft yn Almaeneg mae banodau yn gogwyddo yn ôl cenedl a chyflwr[2]:

Cyflwr Unigol Lluosog
Gwrywaidd Benywaidd Niwtral
Goddrychol der die das die
Gwrthrychol den die das die
Genidol des der des der
Derbynniol dem der dem den

Mae'r Gymraeg hefyd yn ymasiadol, er enghraifft mae'r gair ffyrdd yn cynnwys dau forffem wedi'u hymasio; ffordd a'r lluosog.

Enghraifft arall yw rhediad berf, h.y. newid y ffurf y ferf i amgodio wybodaeth am rai neu'r cwbl o fodd, stad (gweithredol neu oddefol a.a.), amser, agwedd, person, cenedl, a rhif. Mewn iaith ymasiadol, gall cludo dwy neu fwy o ddarnau hyn o wybodaeth gan ddim ond un forffem, yn arferol olddodiad.

Cyfeiriadau[golygu | golygu cod y dudalen]

  1. Deutscher, Guy (2005) The Unfolding of Language, William Heinemann, Llundain.
  2. Griesbach, Heinz / Schulz, Dora (1960): Grammatik der deutschen Sprache, Max Hueber Verlag, München.

Gweler hefyd[golygu | golygu cod y dudalen]