Thomas Kinkade

Oddi ar Wicipedia
Jump to navigation Jump to search
Thomas Kinkade
ThomasKinkade.jpg
Thomas Kinkade yn 2005.
Ganwyd19 Ionawr 1958 Edit this on Wikidata
Sacramento Edit this on Wikidata
Bu farw6 Ebrill 2012 Edit this on Wikidata
Monte Sereno Edit this on Wikidata
DinasyddiaethUnol Daleithiau America Edit this on Wikidata
Alma mater
Galwedigaetharlunydd Edit this on Wikidata
Arddullcelf tirlun Edit this on Wikidata
Gwefanhttp://www.thomaskinkade.com Edit this on Wikidata

Arlunydd Americanaidd oedd Thomas Kinkade (19 Ionawr 19586 Ebrill 2012) sydd yn nodedig am ei baentiadau o olygfeydd eidylaidd a chartrefol. Mae ei baentiadau yn aml yn cynnwys bythynnod, pontydd, gerddi, a themâu "Americana". Cynhyrchodd hefyd baentiadau yn arddull Argraffiadaeth, dan y ffugenw Robert Girrard, o 1984 i 1990.[1]

Ganed yn Sacramento[1] a chafodd ei fagu gan ei fam yn Placerville yng ngogledd Califfornia.[2] Astudiodd hanes celf ym Mhrifysgol Califfornia, Berkeley am ddwy flynedd cyn symud i Goleg Dylunio'r Ganolfan Gelf yn Pasadena, Califfornia. Wedi iddo raddio o'r ysgol gelf, teithiodd Kinkade gyda'i gyfaill James Gurney ar y wagen ar draws y wlad, o Galiffornia i Efrog Newydd, yn braslunio tirluniau a threfluniau'r Unol Daleithiau. Cyhoeddwyd rhai o'u lluniau yn y gyfrol The Artist's Guide to Sketching (1982).[1]

Symudodd Kinkade i Hollywood, a chafodd waith yn paentio cefnluniau ar gyfer y ffilm ffantasi animeiddiedig Fire and Ice (1983). Cynhyrchodd ryw 700 o gefnluniau ar gyfer y ffilm honno, sydd yn nodweddiadol o'i dechnegau llewychol.[1] Yn y 1980au, trodd Kinkade yn Gristion ailanedig. Ar yr un pryd, trodd ei sylw at werthu ei waith yn y farchnad boblogaidd yn hytrach na thrwy orielau'r fasnach gelf draddodiadol, a gafodd ei hystyried yn elitaidd ganddo. Gwerthodd ei baentiadau olew mewn orielau lleol, a dechreuodd argraffu printiau rhad o'i waith.[1][2]

Ym 1989 sefydlodd Kinkade a Ken Raasch y cwmni Lightpost Publishing, a ailenwyd yn ddiweddarach yn Media Arts Group, Inc. ac yna The Thomas Kinkade Company. Agorodd orielau ei hunan, yn bennaf yn yr Unol Daleithiau, i adwerthu ei waith. Llwyddodd naws deuluol, heddychlon a hiraethus ei baentiadau i apelio at chwaeth y cyhoedd, a Kinkade oedd un o'r arlunwyr Americanaidd mwyaf poblogaidd a llwyddiannus yn y 1990au. Ymddangosodd ei luniau ar galendrau, cardiau cyfarch, mygiau, ac ati. Ar y llaw arall, cafodd ei waith ei wfftio gan y beirniaid, a'i alw'n Kitsch gan rai.[1]

Bu farw ym Monte Sereno, Califfornia, yn 54 oed, o orddos o alcohol a Valium.[1]

Cyfeiriadau[golygu | golygu cod y dudalen]

  1. 1.0 1.1 1.2 1.3 1.4 1.5 1.6 (Saesneg) Thomas Kinkade. Encyclopædia Britannica. Adalwyd ar 29 Ionawr 2021.
  2. 2.0 2.1 (Saesneg) Matt Flegenheimer, "Thomas Kinkade, Painter for the Masses, Dies at 54", The New York Times (7 Ebrill 2012). Adalwyd ar 29 Ionawr 2021.