Keith Morris

Oddi ar Wicipedia
Jump to navigation Jump to search
Keith Morris
Ganwyd Mawrth 1958 Edit this on Wikidata
Aberystwyth Edit this on Wikidata
Bu farw 5 Hydref 2019 Edit this on Wikidata (61 oed)
Aberystwyth Edit this on Wikidata
Dinasyddiaeth Baner Cymru Cymru
Alma mater
Galwedigaeth ffotograffydd Edit this on Wikidata
Gwefan https://www.artswebwales.com/ Edit this on Wikidata

Ffotograffydd o Gymro oedd Keith Morris (Mawrth 19585 Hydref 2019). Roedd yn adnabyddus am dynnu lluniau yng Nghymru ac yn enwedig am ddogfennu pobl a llefydd ei dref frodorol, Aberystwyth.[1]

Bywyd cynnar ac addysg[golygu | golygu cod y dudalen]

Ganwyd Keith Thomas Morris yn Aberystwyth, yn fab i Mona a John (Jack). Roedd ganddo chwaer a brawd.[2] Aeth i Brifysgol Caerwysg i astudio Daearyddiaeth, Economeg a Cynllunio Trefol ac Ysgol Economeg Llundain. Treuliodd gyfnod yng Nghaliffornia yng nghanol yr 1980au.

Gyrfa[golygu | golygu cod y dudalen]

Cychwynnodd ei yrfa ym myd y theatr, fel cynllunydd goleuo. Daeth yn ffotograffydd llawrydd, bron drwy ddamwain, yn yr 1980au cynnar. Bu'n gweithio i ystod eang o gyrff yn y meysydd cerddoriaeth, theatr, teledu, ffilm a newyddiaduraeth. Roedd hefyd yn tynnu lluniau portread a lluniau priodas. Roedd yn gyfrannwr cyson ar radio a theledu yng Nghymru yn sylwebu ar ffotograffiaeth a byd theatr. Daeth yn bresenoldeb cyfarwydd mewn Eisteddfodau, gwyliau a nifer o ddigwyddiadau cyhoeddus yng Nghymru. Roedd yn gyn-gadeirydd Ffotogallery.

Tynnodd y llun ar gyfer clawr cyntaf y cylchgrawn Golwg yn 1988.[3] Bu hefyd yn tynnu lluniau llyfrgell ar gyfer Photo Library Wales a cychwynodd gyfrannu i asiantaeth Alamy yn 2006. Drwy hynny gwerthwyd ei luniau i gyhoeddwyr ar draws y byd. Yn 2014 cyrhaeddodd werthiant o $250k drwy Alamy.[4] Dywedir fod ei archif yn cynnwys dros filiwn o luniau yn ymestyn nôl i 1976.

Roedd ganddo brosiect personol yn tynnu lluniau o bawb gyda'r un enw ag ef yng Nghymru.[5] Yn y 1990au roedd yn gyfrifol am ddatblygu y wefan 'Theatre in Wales', cyfeiriadur i gwmniau ac unigolion ym myd y theatr yng Nghymru, gyda adolygiadau personol o gynyrchiadau theatrig.[6]

Yn 2008, roedd ei luniau o Aberystwyth yn gefndir i lyfr Aber: Ysgrifau am Aberystwyth gyda chwe ysgrif gan rai o drigolion y dre.

Bywyd personol[golygu | golygu cod y dudalen]

Heblaw am ei amser yn y coleg a'r amser yng Nghaliffornia, treuliodd y rhan fwyaf o'i fywyd yn Aberystwyth, yn y tŷ oedd yn berchen i'w ddadcu.

Roedd yn briod â Gilly ac roedd ganddynt ddwy ferch.

Marwolaeth[golygu | golygu cod y dudalen]

Cyhoeddwyd ar fore 5 Hydref 2019 fod Keith ar goll ers amser cinio 3 Hydref.[7] Erbyn y prynhawn darganfuwyd corff ar draeth Borth, Ynyslas ac fe'i adnabyddwyd yn ffurfiol yn ddiweddarach.[8]

Cyfeiriadau[golygu | golygu cod y dudalen]

  1. Teyrngedau i’r ffotograffydd Keith Morris , Golwg360, 7 Hydref 2019. Cyrchwyd ar 8 Hydref 2019.
  2. (Saesneg) Announcing the passing ofKeith Thomas MORRIS. Western Mail (11 Hydref 2019).
  3. Cofio Keith Morris , Golwg360, 8 Hydref 2019.
  4.  Selling stock photos online with Alamy – $250k and counting…. Alamy (22 Awst 2014). Adalwyd ar 8 Hydref 2019.
  5. (Saesneg) About Keith Morris photographer. Adalwyd ar 8 Hydref 2019.
  6.  The First Tributes. Theatre in Wales (7 Hydref 2019). Adalwyd ar 8 Hydref 2019.
  7. Y ffotograffydd Keith Morris ar goll o Aberystwyth , Golwg360, 5 Hydref 2019. Cyrchwyd ar 8 Hydref 2019.
  8. Darganfod corff wrth chwilio am Keith Morris , Golwg360, 5 Hydref 2019. Cyrchwyd ar 8 Hydref 2019.

Dolenni allanol[golygu | golygu cod y dudalen]