Hightown, Wrecsam

Oddi ar Wicipedia
Jump to navigation Jump to search

Un o faestrefi dinas Wrecsam, gogledd-ddwyrain Cymru, yw Hightown.

Bu rhannau gogledd-orllewinol yr ardal tuag at Eglwys San Silyn, ger Ffordd Salop, yn bentrefan ar wahân o'r enw “Wrecsam Fechan”. Yn sgil twf Wrecsam, yn y 18fed ganrif daeth y pentrefan yn rhan o'r dref fwyaf[1] ond parhaodd yr enw “Wrecsam Fechan” fel enw ar y stryd. Ar fap o 1833, defnyddiwyd yr enw "Wrexham Fechan" ar gyfer rhan o'r stryd sy'n rhedeg o ochr ddeheuol yr afon Gwenfro i fyny'r bryn i gyfeiriad Hightown (ar yr un map, mae'r enw “Salop Street” yn cael ei ddefnyddio ar gyfer rhan o'r stryd ar ochr arall yr afon, ger canol y dref). [2] Ar fap o 1872, defnyddiwyd yr enw "Wrexham Fechan" ar gyfer y stryd sy'n cael ei hadnabod heddiw fel “Kingmills Road” (Ffordd Melin y Brenin). [2]

Roedd gan reilffordd Wrexham & Ellesmere orsaf yn Hightown o'r enw Hightown Halt.

The Travellers Rest, tafarn hanesyddol yn yr ardal.

Tirnod pwysig yn Hightown ydy'r barics milwrol, “Hightown Barracks”. Adeiladwyd y barics yn yr 1870au yn arddull yr Adfywiad Gothig. Yn 1877 symudodd y Denbighsire Militia yno o'i hen bencadlys ar Stryt y Rhaglaw (heddiw Amgueddfa ac Archifau Bwrdeistref Sirol Wrecsam). Wedyn daeth y barics yn gartref i'r Ffiwsilwyr Brenhinol Cymreig.[3][4]

Mae gan Hightown ei ardal siopau ei hun wrth y gyffordd rhwng Ffordd Salop a Ffordd Melin y Brenin. Mae adeiladau hanesyddol yr ardal yn cynnwys tafarndai'r Green Dragon a'r Travellers' Rest, yn ogystal â Beechley House, tŷ rhestredig gradd II [2] wedi'i adeiladu yn yr 18fed ganrif fel preswylfa breifat.[5]

Mae digon o dai sy'n dyddio o'r 19eg ganrif yn sefyll ar hyd strydoedd Hightown. Hyd at 2011, roedd yr ardal yn gartref i "Hightown Flats", pum bloc o fflatiau pum llawr.[6][7] Roedd gan y fflatiau broblemau diogelwch, a bu problemau yn yr ardal gydag ymddygiad gwrthgymdeithasol. Dymchwelwyd y fflatiau yn 2011 er mwyn ailddatblygu'r ardal gyda chefnogaeth y gymuned leol.[8][9]

Cyfeiriadau[golygu | golygu cod y dudalen]

  1. Irish, Sandra (1987). "Spatial patterns in the small town in the nineteenth century - a case study of Wrexham" (PDF). Aber.ac.uk. Cyrchwyd 17 Tachwedd 2022.
  2. 2.0 2.1 2.2 "Salisbury Park Conservation Area Assessment" (PDF). Wrexham.gov.uk. Cyrchwyd 22 Tachwedd 2022.
  3. Brennan, Shane (2017-02-04). "The army has 'clarified' its plans for one of its North Wales barracks". North Wales Live (yn Saesneg). Cyrchwyd 2022-04-30.
  4. Idris Jones, John (2018). Secret Wrexham. Amberley Publishing. ISBN 9781445677019.
  5. "Beechley House, Wrexham". Wrexham History. Cyrchwyd 17 Tachwedd 2022.
  6. "Demolition of Hightown flats in Wrexham going to plan". The Leader (yn Saesneg). Cyrchwyd 2022-04-30.
  7. WalesOnline (2011-06-22). "Wrexham's Hightown flats finally demolished". WalesOnline (yn Saesneg). Cyrchwyd 2022-04-30.
  8. "Wrexham's landmark Hightown flats to be demolished". BBC News (yn Saesneg). 2011-01-05. Cyrchwyd 2022-04-30.
  9. Moffitt, Dominic (2021-10-16). "Stunning images show lost Hightown flats in Wrexham through the ages". North Wales Live (yn Saesneg). Cyrchwyd 2022-04-30.