Eglwys San Silyn, Wrecsam

Oddi ar Wicipedia
Jump to navigation Jump to search
Eglwys San Silyn
Stgileswrexham.jpg
Math eglwys blwyf Edit this on Wikidata
Sefydlwyd
  • 15G Edit this on Wikidata
Daearyddiaeth
Lleoliad Wrecsam Edit this on Wikidata
Sir Wrecsam Edit this on Wikidata
Gwlad Baner Cymru Cymru
Cyfesurynnau 53.0442°N 2.9927°W Edit this on Wikidata
Manylion
Statws treftadaeth adeilad rhestredig Gradd I Edit this on Wikidata

Eglwys blwyf a leolir yn Wrecsam yw Eglwys San Silyn (Saesneg: St Giles' Church)[1] Mae addoldy wedi sefyll ar y safle ers y 13g o leiaf, ond codwyd y mwyafrif o'r adeilad presennol yn y 15g. Mae'n debyg mai'r arglwyddes Margaret Beaufort, mam Harri Tudur a gwraig i Thomas Stanley, Iarll Derby, a noddodd yr adeilad newydd. Os felly, mae'r eglwys yn un o nifer yng ngogledd-ddwyrain Cymru a noddwyd gan y teulu Stanley, sy'n cynnwys eglwysi plwyf Gresffordd a'r Wyddgrug a Ffynnon Gwenffrewi yn Nhreffynnon.[2]

Caiff Eglwys San Silyn ei hystyried yn reolaidd fel un o gampweithiau pensaernïol Cymru,[3][4] ac yn ôl yn y rhigwm Saesneg o'r 18g, mae ei thŵr yn un o Saith Rhyfeddod Cymru. Mae'r eglwys yn enwog yn ryngwladol am fod Elihu Yale, a roes ei enw i Brifysgol Yale yn yr Unol Daleithiau, wedi'i gladdu yn y fynwent.

Hanes[golygu | golygu cod y dudalen]

Daw'r cyfeiriad cynharaf at eglwys yn Wrecsam o 1220, pan rhoddwyd haner incwm degymau'r eglwys honno i Abaty Glyn y Groes gan Reyner, Esgob Llanelwy. Ceir cyfeiriad arall ati ym 1247 pan rhoddwyd rhagor o ddegymau'r eglwys i'r abaty gan Madog ap Gruffydd, tywysog Powys. Ar 15 Tachwedd 1330 chwythodd y clochdy i lawr ac ail-adeiladwyd yr eglwys yn gyfangwbl. Y gred boblogaidd oedd bod Duw wedi cosbi'r dref am gynnal marchnad ar y Sul, a symudwyd diwrnod marchnad Wrecsam i ddydd Iau o ganlyniad i hyn.[5]

Llosgodd yr eglwys o'r 14g gan mlynedd wedi iddi gael ei hadeiladu, ac fe'i hail-godwyd yn yr arddull Gothig hwyr a elwir yn "Berpendiciwlar", efallai dan nawdd yr arglwyddes Margaret Stanley. Dyma un o'r eglwysi mawr olaf a'u hadeiladwyd yn y deyrnas cyn y Diwygiad Protestannaidd.[6]

Tŵr Iâl

Adeiladwyd y clochdy, a elwir yn "Dŵr Iâl", yn negawdau cynnar yr 16g.[7] Fe'i priodolir i'r saer William Hort neu Hart o Fryste.[8] Mae'n seiliedig ar dŵr canolog Eglwys Gadeiriol Caerloyw, ac mae'n bosib bod y saer naill ai wedi gweithio ar adeiladu'r gadeirlan honno neu wedi teithio i Gaerloyw i'w hastudio.[2] Mae nifer o gerfluniau wedi goroesi ar y tŵr, ond nid yw'n glir faint ohonynt sy'n rhai gwreiddiol.[8]

Uwchben bwa'r gangell y mae'r unig beintiad canoloesol o Ddydd y Farn sydd wedi goroesi yng Nghymru.[9] Mae'n bosib fod hyn gan yr un arlunydd a beintiodd y murlun o Sant Cristoffer yn Eglwys Sant Saeran, Llanynys, am fod yr arddull yn debyg.[10] Mae'r cerfluniau pren o angylion yn canu offerynnau yn dyddio'n ôl i'r 15g,[11] a'r ddarllenfa bres ar ffurf eryr i tua 1524.[12]

Cyfrannodd Elihu Yale yn hael at addurno'r eglwys yn y 18g cynnar; talodd am galeri (nad sydd wedi goroesi) ym 1707, ac mae'n debyg bod sgrîn haearn y gangell gan aeod o'r teulu Davies, sy'n enwog am eu gwith haearn, yn rhodd ganddo hefyd.[13] (Un gwaith sydd yn sicr gan Robert Davies yw'r giatiau haearn i'r fynwent, a grewyd gan yr enwog Davies ym 1720.)[14] Mae beddrod Elihu Yale yn y fynwent, yng nghysgod y tŵr. Ym mhlith y cofadeiladau eraill o'r 18g mae dau gan y cerflunydd Ffrengig nodedig Louis-François Roubiliac.[15] Yn y ganrif olynol, cynlluniwyd cofadail Anne Fryer ym 1817 gan y cerflunydd neo-glasurol Syr Richard Westmacott.[16]

Atgyweiriwyd Eglwys San Silyn yn fewnol gan Benjamin Ferrey o 1866 i 1867 ac ar y tu allan o 1901 i 1903 gan H. A. Prothero.[17] Yn ystod atgyweiriad Ferrey, codwyd cofadail i Mary Ellen Peel a gerfiwyd gan Thomas Woolner, un o aelodau gwreiddiol Brawdoliaeth y Cyn-Raffaeliaid.[16] Mae model plastr Woolner ar gyfer y gofeb yng nghasgliad Amgueddfa Genedlaethol Caerdydd.[18] Ym 1914 adnewyddwyd y gangell yn rannol gan Syr Thomas Graham Jackson;[8] mae gwrthgefn marmor yr allor i'w gynlluniau ef. Ym 1918–19 cynlluniodd Jackson gapel yn coffa'r Rhyfel Byd Cyntaf yn yr eil ogleddol.[8]

Ar gampws Prifysgol Yale yn New Haven, Connecticut, mae'r "Wrexham Tower" a godwyd yn y 1920au yn gopi o glochdy Wrecsam. Rhoddwyd un maen o Eglwys San Silyn i'r adeilad newydd ac mae maen o New Haven wedi cymryd ei le.[19]

Ym 1951, penodwyd Eglwys San Silyn yn adeilad rhestredig Gradd I.[20]

Oriel[golygu | golygu cod y dudalen]

Cyfeiriadau[golygu | golygu cod y dudalen]

  1. Ceir "Eglwys Sant Giles" fel ffurf Gymraeg yn Gwyddoniadur Cymru (t. 707).
  2. 2.0 2.1 Coldstream 2008, t. 9
  3. Jenkins 2008, t. 90
  4. Wooding 2011, t. 74
  5. (Saesneg) History of St Giles [1]. Plwyf Wrecsam. Adalwyd ar 10 Ebrill 2015.
  6. (Saesneg) History of St Giles [2]. Plwyf Wrecsam. Adalwyd ar 10 Ebrill 2015.
  7. Lord 2003, t. 210
  8. 8.0 8.1 8.2 8.3 Hubbard 1986, t. 300
  9. Lord 2003, t. 192
  10. Coldstream 2008, t. 55
  11. Lord 2003, t. 197
  12. Lord 2003, t. 229
  13. Hubbard 1986, tt. 300–1
  14. Hubbard 1986, t. 302
  15. Hubbard 1986, t. 301–2
  16. 16.0 16.1 Hubbard 1986, t. 301
  17. Hubbard 1986, t. 298
  18. (Saesneg) Heavenly Welcome: A Model for a Memorial to Mary Ellen Peel and her son Archibald by Thomas Woolner. Y Gronfa Gelf. Adalwyd ar 4 Chwefror 2016.
  19. Hughes 2007, t. 127
  20. (Saesneg) Parish Church of St. Giles, Offa. British Listed Buildings. Adalwyd ar 2 Mai 2015.

Llyfryddiaeth[golygu | golygu cod y dudalen]

  • Coldstream, Nicola (2008). Builders & Decorators: Medieval Craftsmen in Wales. Caerdydd: Cadw. 
  • Hubbard, Edward (1986). Clwyd: Denbighshire and Flintshire. The Buildings of Wales. Llundain: Penguin. 
  • Hughes, T. J. (2007). Wales's Best 100 Churches. Pen-y-bont ar Ogwr: Seren. 
  • Jenkins, Simon (2008). Wales: Churches, Houses, Castles. Llundain: Penguin. 
  • Lord, Peter (2003). Gweledigaeth yr Oesoedd Canol. Diwydiant Gweledol Cymru. Caerdydd: Gwasg Prifysgol Cymru. 
  • Wooding, Jonathan M. a Nigel Yates (gol.) (2011). A Guide to the Churches and Chapels of Wales. Caerdydd: Gwasg Prifysgol Cymru.