Connie Francis

Connie Francis
Connie Francis ym 1961.
Ffugenw	Connie Francis
Ganwyd	Concetta Rosa Maria Franconero  12 Rhagfyr 1937  Newark
Bu farw	16 Gorffennaf 2025  Pompano Beach
Man preswyl	Florida
Label recordio	MGM Records, Polydor, United Artists Records, Malaco Records, Legacy Recordings
Dinasyddiaeth	Unol Daleithiau America
Alma mater	Belleville High School Newark Arts High School
Galwedigaeth	canwr, actor teledu, cyfansoddwr caneuon, actor ffilm, awdur, actor
Cyflogwr	UNICEF
Arddull	cerddoriaeth bop, draddodiadol, roc a rôl, pop gwlad, jazz, canu gwlad, canu gwerin, cerddoriaeth boblogaidd, jazz lleisiol
Plaid Wleidyddol	plaid Weriniaethol
Gwobr/au	Awit Awards, Italian Walk of Fame
Gwefan	https://www.conniefrancis.com/
llofnod

Cantores o'r Unol Daleithiau oedd Connie Francis (Concetta Maria Franconero; 12 Rhagfyr 1937 – 16 Gorffennaf 2025) sy'n nodedig am ganu sawl math o gerddoriaeth boblogaidd ac mewn sawl iaith. Bu ei gyrfa ar ei hanterth yn y 1950au a'r 1960au, pryd rhyddhaodd nifer fawr o albymau a senglau o ganu gwerin a thraddodiadol, roc a rôl, baledi sentimental, a chaneuon difyr. Bu hefyd yn recordio caneuon gwlad, jazz, schlager, emynau ysbrydol, a detholion o sioeau cerdd Broadway.

Ganed yn Newark, New Jersey, i deulu o Americanwyr Eidalaidd yn y dosbarth gweithiol. Dysgodd i ganu ac i ganu'r acordion ac ymddangosodd ar y rhaglen deledu Talent Scouts yn 1950. Mabwysiadodd yr enw llwyfan Connie Francis a pherfformiodd ar sioe deledu amrywiaethol i blant am bedair blynedd. Cafodd gontract gydag MGM Records yn 1955, ond methiannau a fu ei senglau cyntaf. Cafodd lwyddiant yn 1957 gyda'r gân "Who's Sorry Now" ac ymddangosodd ar y rhaglen Bandstand. Yn sgil llwyddiant Connie Francis Sings Italian Favorites (1959), recordiodd sawl albwm arall o ganeuon traddodiadol a oedd yn perthyn i wahanol grwpiau ethnig. Ar anterth ei gyrfa ymddangosodd Francis ar deledu yn aml ac actiodd mewn sawl ffilm i blant yn eu harddegau, megis Where the Boys Are (1960). Dirywiodd lwyddiannau'r eilunod Americanaidd ifainc yng nghanol y 1960au o ganlyniad i ddyfodiad y Beatles a bandiau roc eraill o Loegr, a phenderfynodd Francis gael seibiant yn ei gyrfa.

Dychwelodd Francis at y llwyfan a'r stiwdio yn nechrau'r 1970au. Wedi perfformiad yn Long Island yn 1974, cafodd ei threisio yn ei hystafell gwesty gan dresmaswr, ac oherwydd y trawma trodd ei chefn ar fyd adloniant unwaith eto. Llofruddiwyd ei brawd hi gan y Maffia yn 1981, a threuliodd hi ryw ddeng mlynedd yn derbyn triniaeth seiciatrig i ymdopi â thrychinebau ei bywyd personol. Er gwaethaf hynny, dychwelodd at berfformio a recordio cerddoriaeth. Cyhoeddwyd dau hunangofiant ganddi, Who's Sorry Now? yn 1984 ac Among My Souvenirs yn 2017.

Bu farw yn Fflorida, yn 87 oed.