Afon Ro

Oddi ar Wicipedia
Jump to navigation Jump to search
Afon Ro
Math afon Edit this on Wikidata
Daearyddiaeth
Sir Conwy Edit this on Wikidata
Gwlad Baner Cymru Cymru
Cyfesurynnau 53.212°N 3.83°W Edit this on Wikidata
Mae 'Afon Tafolog' yn ailgyfeirio i'r dudalen hon.

Afon yn Sir Conwy yw Afon Ro (weithiau Afon Roe, e.e. ar y map Ordnans). Mae'n un o lednentydd chwith Afon Conwy. Enwir pentref Rowen ar ôl yr afon. Hyd: tua 5 milltir.

Afon Ro ger Rowen.
Rhyd ar Afon Ro ger Caerhun.

Cwrs[golygu | golygu cod y dudalen]

Tardda Afon Ro o sawl ffrwd fechan ar lethrau deheuol Tal-y-fan, i'r dwyrain o Fwlch-y-Ddeufaen. Mae'r uchaf o'r ffrydiau hyn yn tarddu tua 480 metr i fyny ychydig i'r de o gopa gorllewinol Tal-y-fan. Mae ffrydiau eraill yn tarddu ychydig i'r dwyrain gan lifo'n agos i hen gromlech Maen y Bardd. Ar ôl dilyn cwrs deheuol ymunant i ffurfio Afon Ro. Yna mae Afon Tafolog, sy'n hel nifer o ffrydiau mynyddig yn y corsdir ger Bwlch-y-Ddeufaen, yn ymuno ag Afon Ro sy'n llifo wedyn ar gwrs i gyfeiriad y gogledd-ddwyrain.

Mae'n llifo drwy bentref Rowen ac wedyn yn gwneud tro bedol i lifo i gyfeiriad y de. Mae'n mynd dan bont ar y B5106 (Conwy - Betws-y-Coed) a heibio i bentref Caerhun. Mae'n troi i'r dwyrain eto gan fynd heibio i safle caer Rufeinig Canovium (Caerhun) i lifo i Afon Conwy.[1]

Cyfeiriadau[golygu | golygu cod y dudalen]

  1. Map Arolwg Ordnans 1:50,000, taflen 115.