Thomas Percy

Oddi ar Wicipedia
Neidio i: llywio, chwilio
Am bobl eraill o'r un enw, gweler Thomas Percy (gwahaniaethu).

Clerigwr Anglicanaidd, awdur a hynafiaethydd oedd Thomas Percy (13 Ebrill 1729 - 30 Medi 1811), Esgob Dromore. Roedd yn frodor o Bridgnorth, Swydd Amwythig. Cyn cael cael ei benodi yn esgob bu'n gaplan i Siôr III. Cofir Percy yn bennaf am ei gyfrol hynod ddylanwadol Reliques of Ancient English Poetry (1765), casgliad o faledi o Loegr a Gororau'r Alban a chafodd ddylanwad mawr ar y mudiad Rhamantaidd ac a fu'n gyfrifol am adfer y faled fel ffurf lenyddol yn Lloegr.

Cyhoeddodd Percy sawl cyfieithiad o weithiau hynafol, yn cynnwys cerddi Islandig a fersiwn o Ganiad Solomon. Cyhoeddodd gyfres o erthyglau am lenyddiaeth Tsieinëeg hefyd.

Roedd yn ffigwr cyfarwydd yng nghylchoedd llenyddol Lloegr, yn adnabod Samuel Johnson, Thomas Warton, a James Boswell.

Ymddengys fod Percy wedi cael ei ysbrydoli gan lwyddiant cerddi "Ossian" gan James MacPherson. Cafodd hyd i'r baledi mewn hen lawysgrif roedd morwyn yn nhŷ un o'i gyfeillion am losgi yn y tân. Diwygiodd rhai o'r cerddi a chyhoeddi'r gwaith yn 1765. Daeth yn gyfrol boblogaidd iawn a aeth trwy sawl argraffiad. Cafodd ddylanwad yng Nghymru hefyd: dyma'r fath o ddiddordeb mewn hynafiaethau yn y 18fed ganrif yn Lloegr a symbolodd golygyddion y Myvyrian Archaiology of Wales i fynd ati i gyhoeddi'r gyfrol honno ar ddechrau'r 19eg ganrif, yn rhannol er mwyn profi i'r byd fod gan Gymru hefyd lenyddiaeth hynafol a chyfoethog.