Geiseric

Oddi ar Wicipedia
Neidio i: llywio, chwilio
Geiseric yn cipio Rhufain

Brenin llwyth Almaenig y Fandaliaid oedd Geiseric (tua 389 - 25 Ionawr 477). Ystyrir mai ef oedd y mwyaf o frenhinoedd y Fandaliaid.

Roedd Genseric yn fab i'r brenin Godigisel, a ganed ef tua 389, mae'n debyg yn ardal Llyn Balaton yn Hwngari. Daeth i'r orsedd yn 427 neu 428. Yn 429 cymerodd fantais o anghydfod yn yr Ymerodraeth Rufeinig i groesi i Ogledd Affrica gyda 80,000 o wŷr. Gosodasant warchae ar ddinas Hippo Regius, lle bu Sant Awstin farw yn Awst 430 yn ystod y gwarchae. Gwnaed heddwch â'r Rhufeiniaid am gyfnod, ond ym 439 cipiodd Geiseric ddinas Carthago.

Tyfodd Teyrnas y Fandaliaid a'r Alaniaid yn deyrnas gref yn ystod teyrnasiad Geiseric. Yn 455 cipiwyd dinas Rhufain ganddynt. Dywedir i'r Pab Leo Fawr gyfarfod Geiseric tu allan i'r ddinas a'i berswadio i beidio niweidio'r trigolion, ond anrheithiwyd y ddinas. Bu farw Geiseric yn 477, a dilynwyd ef gan ei fab Huneric.