Kasserine
 | |
| Math | municipality of Tunisia  |
|---|---|
| Poblogaeth | 108,794 |
| Daearyddiaeth | |
| Sir | Kasserine |
| Gwlad |  Tiwnisia |
| Uwch y môr | 656 metr |
| Yn ffinio gyda | Foussana |
| Cyfesurynnau | 35.17°N 8.83°E |
| Cod post | 1200 |
 | |
Dinas yn Nhiwnisia yw Kasserine (Arabeg قصرين Al-Qasrayn). Fe'i lleolir yng ngorllewin y wlad ac mae'n ganolfan weinyddol y dalaith (gouvernorat) o'r un enw, sef Kasserine, am y ffin rhwng Tiwnisia ac Algeria. Poblogaeth: 76,243 (2004).[1]
Economi[golygu | golygu cod]
Ei phrif ddiwydiant yw amaethyddiaeth, ac yn enwedig tyfu a phrosesu gwair esparto i wneud papur. Mae'n ganolfan cludiant rhanbarthol. Y trefi agosaf yw Sbeitla (38 km) a Thala (tua 60 km).
Amgylchedd[golygu | golygu cod]
Mae'r ardal o gwmpas y ddinas yn fynyddig ac yn rhan o gadwyn Dorsal Tiwnisia. Lleolir Jebel Chambi (1,544 m), mynydd uchaf y wlad, i'r gorllewin. Mae'n oer iawn yn y gaeaf a dydy eira ddim yn anghyffredin.
Hanes[golygu | golygu cod]
Ar gwr y ddinas fechan ceir safle dinas Rufeinig Cilium. Ceir adfeilion theatr a bwa buddugoliaeth yno. Yn yr Ail Ryfel Byd ymladdwyd Brwydr Kasserine rhwng yr Almaenwyr a'r Cynghreiriaid yn y mynyddoedd ger y ddinas. Llwyddodd Afrika Korps y cadfridog Erwin Rommel i gipio bwlch Kasserine o ddwylo'r Americanwyr ond fe'i cipwyd yn ôl gan y lluoedd Prydeinig wedyn.
Brwydro 2013[golygu | golygu cod]
Yn 2013, ymsefydlodd grwp o wrthryfelwyr Islamaidd ym mynyddoedd Jebel Chambi, ger Kasserine. Lladdwyd wyth milwr Tiwnisiaidd gan y gwrthryfelwyr ar 29 Gorffennaf 2013.[2] Ddechrau mis Awst 2013 dechreuodd byddin Tiwnisia ymosod ar eu llochesau gan ddefnyddio gynnau ac ymosodiadau o'r awyr gan awyrennau Llu Awyr Tiwnisia. Yn ôl terfysgwr a ddalwyd, mae'r jihadwyr yn cynnwys Algeriaid, Mawritaniaid a Nigeriaid ond mae'r mwyafrif yn Tiwnisiaid.[2]
Cyfeiriadau[golygu | golygu cod]
- ↑ "copi archif". Archifwyd o'r gwreiddiol ar 2015-09-24. Cyrchwyd 2010-05-18.
- ↑ 2.0 2.1 Tunisie : Le terroriste Mohamed Habib Amri a filmé le massacre des 8 militaires au Mont Chaambi Kapitalis.tn.