Huw Aaron

Oddi ar Wicipedia
Jump to navigation Jump to search
Huw Aaron
Ganwyd1980 Edit this on Wikidata
DinasyddiaethBaner Cymru Cymru
Galwedigaethcartwnydd, cyfrifydd Edit this on Wikidata

Cartwnydd, artist comic a darlunydd yw Huw Aaron (ganed 22 Hydref 1980). Ganed ef yn Abertawe, a mae bellach yn byw yng Nghaerdydd.

Gyrfa[golygu | golygu cod y dudalen]

Mae'n gweithio'n llawrydd ers 2009, ar ôl cyfnod yn gweithio fel cyfrifydd siartredig[1].

Mae Huw wedi darlunio nifer o lyfrau i blant a stribedi comig, gan gynnwys y cylchgrawn Mellten[2]. Lansiwyd Mellten ar y 30ain o Fai, 2016, gan gyhoeddi 15 rhifyn. Ers Medi 2021, mae Mellten wedi cyfuno gyda chylchgrawn CIP gan Urdd Gobaith Cymru, a gyhoeddir yn ddigidol bob deufis.

Mae wedi cyfrannu cartwnau at Private Eye, Reader's Digest, The Oldie, The New Statesman a'r Spectator yn rheolaidd[3].

Yn 2020, yng nghanol cyfnod clo pandemig COVID-19, creodd gyfres o fideos ar YouTube dan yr enw Criw Celf[4] oedd yn dysgu plant sut i ddarlunio cartwnau.

Fel darlunydd mae wedi gweithio gyda'r awduron Manon Steffan Ros, Bethan Gwanas, Elidir Jones, Meilyr Siôn, Dan Anthony a Wendy White.

Creodd gêm frwydro cardiau tebyg i Top Trumps gyda themâu chwedloniaeth Gymraeg fel y Mabinogi a llên gwerin. Cynhyrchwyd dau becyn o'r gêm gan gwmni Atebol: Chwedlau Cymru: Cardiau Brwydro - Bwystfilod Hudol a Chwedlau Cymru: Cardiau Brwydro - Y Mabinogi. Mewn cyfweliad am y gêm dywedodd:

Fel un sydd wrth fy modd gyda chwedloniaeth Cymru, o'n i'n awyddus i ledaenu'r straeon hynod sydd gyda ni yn ein diwylliant i gynulleidfa ehangach. Mae plant Cymru yn wybodus iawn am chwedlau Groeg er enghraifft, ond prin yn gwybod am ein straeon ni. [...] Dwi wastad wedi caru Top Trumps a gemau cardiau eraill tebyg, ers yn blentyn. Mae rhyw hud yn digwydd wrth gyfuno llun, ychydig o destun, a 'stats' - mae'r wybodaeth yna yn tanio dychymyg plentyn ac yn troi'r cerdyn yn gymeriad fyw. [5]

Yn 2019 sefydlodd y cyhoeddwr Gwasg Broga gyda'r bwriad o gyhoeddi llyfrau Cymraeg sydd yn "llyfrau lliwgar, gwreiddiol, gwahanol i blant Cymru."[6]

Bywyd Personol[golygu | golygu cod y dudalen]

Mae'n briod â'r artist ac awdur Luned Aaron.

Cyhoeddiadau (fel awdur)[golygu | golygu cod y dudalen]

  • Llyfr Hwyl y Lolfa (2013)
  • Mwy o Jôcs y Lolfa (2014)
  • Ble Mae Boc? (2018)
  • Find the Dragon! (2019)
  • Seren a Sbarc : Yn Achub (Cwpan) y Bydysawd (gyda Elidir Jones) (2019)
  • Y Ddinas Uchel (2019)
  • Ble Mae Boc? Ar Goll yn y Chwedlau (2020)
  • Pam? (gyda Luned Aaron) (2021)
  • Gwil Garw a'r Carchar Crisial (2021)

Cyhoeddiadau (fel darlunydd)[golygu | golygu cod y dudalen]

  • Cyfres Steve's Dreams gan Dan Anthony
  • Cyfres Trio gan Manon Steffan Ros
  • Cyfres Chwedlau'r Copa Coch gan Elidir Jones
  • St. David's Day is Cancelled gan Wendy White
  • Hufen Afiach gan Meilyr Sion
  • Mynydd i'w Ddringo gan Myrddin ap Dafydd

Cyfeiriadau[golygu | golygu cod y dudalen]

  1. "Huw Aaron". Huw Aaron (yn Saesneg). Cyrchwyd 2021-11-15.
  2. "Mellten - Amdano". www.mellten.com. Cyrchwyd 2021-11-15.
  3. "Huw Aaron | Professional Cartoonists' Organisation UK". procartoonists.org. Cyrchwyd 2021-11-15.
  4. (yn en) CRIW CELF - Gwil Garw, Casglwr Angenfilod, https://www.youtube.com/watch?v=p5YwpZDu-nc&list=PLfeAJMS004a-udRyjqvb5b-sTRlf0vADu, adalwyd 2021-11-15
  5. Rowlands, Neil. "Y Darlunydd / The Artist Huw Aaron – Parallel.cymru: Cylchgrawn digidol Cymraeg dwyieithog". Cyrchwyd 2021-11-15.
  6. "llyfraubroga". Twitter (yn Saesneg). Cyrchwyd 2021-11-15.