Jasper Johns

Un o weithiau Jasper Johns yn amgueddfa celfyddyd fodern Efrog Newydd (MOMA).

Arlunydd Americanaidd yw Jasper Johns (ganwyd 15 Mai 1930) a gysylltir â'r mudiad celfyddyd bop.

Ganwyd yn Augusta yn nhalaith Georgia. Astudiodd am flwyddyn ym Mhrifysgol De Carolina cyn iddo symud i Ddinas Efrog Newydd i weithio fel arlunydd. Ym 1954 fe gychwynnodd ar ei gyfres enwog o beintiadau o'r faner Americanaidd. Peintiodd destunau dau ddimensiwn megis baneri, mapiau, labeli, rhifau, a llythrennau mewn lliwiau syml a gyda thechneg llosgliw, hynny yw pigmentau wedi cymysgu â chwyr poeth.

Ym 1961, dechreuodd Johns osod gwrthrychau ar ei gynfasau. Newidiodd ei arddull yn y 1970au gyda'i crosshatchings: casgliadau o linellau cyfochrog, weithiau yn ddu a gwyn. Yn y 1980au, darluniodd elfennau ffigurol a chyfeiriadau at ei fywyd yn ei beintiadau.

Derbyniodd Wobr Gelfyddyd Wolf ym 1986, wobr beintio y Praemium Imperiale ym 1993, a Medal Rhyddid yr Arlywydd yn 2011.