Indianapolis 500

Oddi ar Wicipedia
Jump to navigation Jump to search
Indianapolis Motor Speedway, lleoliad ras yr Indianapolis 500.

Ras geir flynyddol sy'n cael ei chynnal yn yr Indianapolis Motor Speedway (IMS) yn Speedway, un o faestrefi dinas Indianapolis yn nhalaith Indiana yn yr Unol Daleithiau America, yw'r Indianapolis 500. Mae'r trac yn hirsgwar crwn 2.5 milltir o hyd. Mae'r gyrrwyr yn mynd rownd y trac 200 o weithiau yn wrth-glocwedd am bellter o 500 milltir (800 km). Mae'r digwyddiad yn cael ei gynnal ar benwythnos Dydd y Cofio yr UDA ddiwedd mis Mai. Mae ymarferion a threialon amser yn cael eu cynnal yn y pythefnos sy'n arwain at y ras.

Mae'r ras yn rhan o gyfres Verizon INDYCAR, lefel uchaf Pencampwriaeth Rasio Ceir Americanaidd, sy'n cael ei adnabod ar lafar fel "Rasio Indy Car".

Mae'r ras yn cael ei hystyried yn rhan o Goron Driphlyg Rasio Ceir, sydd hefyd yn cynnwys Grand Prix Monaco a ras 24 Awr Le Mans. Nid yw maint y dorf yn cael ei gyhoeddi'n swyddogol, ond mae seddi yno ar gyfer dros 250,000 o bobl.[1]

Mae enw'r ras, sy'n cyfuno ei lleoliad a'i phellter, yn cael ei fyrhau i Indy 500, ac mae'r trac ei hun yn cael ei alw'n "the Brickyard" am fod ei arwyneb wedi'i wneud o fric pan gafodd ei osod yn hydref 1909.

Cynhaliwyd y ras gyntaf yn 1911 a Ray Harroun oedd yr enillydd. Dathlodd y digwyddiad ei benblwydd yn 100 yn 2011, a chynhaliwyd y 100fed ras yn 2016. Y gyrrwyr mwyaf llwyddiannus dros y blynyddoedd oedd A. J. Foyt, Al Unser Sr., a Rick Mears, pob un ohonynt wedi ennill y ras bedair gwaith. Y perchennog mwyaf llwyddiannus yw Roger Penske, perchennog Team Penske, sydd wedi ennill 17 o weithiau ac 17 ar flaen y grid.

Mae yna lawer o draddiadau yn gysylltiedig â'r ras, yn y seremonïau cyn y ras, y dathliadau sy'n dilyn, a threfn y ras. Y mwyaf nodedig a'r mwyaf poblogaidd yw'r maes o 33 car, canu "Back Home Again in Indiana," a'r botel o laeth yn y lôn fuddugol.

Cyfeiriadau[golygu | golygu cod y dudalen]

  1. "World Stadiums - Stadium List :: 100 000+ Stadiums". Cyrchwyd 1 May 2016.