Cyffur gwrthasid

Oddi ar Wicipedia
Jump to navigation Jump to search
Cyffur gwrthasid
Antacid-L478.jpg
Data cyffredinol
Math Gastrointestinal agents, mechanism of action edit this on wikidata
Dynodwyr
Freebase /M/01098 edit this on wikidata
Thesawrws y BNCF 8975 edit this on wikidata
MeSH D000863 edit this on wikidata
Arall
Commons page Ffeiliau perthnasol ar Gomin Wicimedia

Mae cyffur gwrthasid yn sylwedd sy'n niwtraleiddio asid yn y stumog, er mwyn lleddfu dŵr poeth (llosg cylla), diffyg traul (camdreuliad) neu stumog wael[1].

Defnydd meddygol[golygu | golygu cod y dudalen]

Mae suddion treulio'r ystumog yn cynnwys asid ac ensymau sydd yn torri bwyd i lawr cyn ei fod yn pasio i'r coluddion. Mae wal y stumog yn cael ei amddiffyn rhag yr asid gan haen o fwcws sy'n cael ei gynhyrchu yn barhaus gan leinin y stumog. Gall problemau codi os yw leinin y stumog wedi ei anafu neu os oes mwy o asid yn cael ei greu na all y mwcws ei drin[2]. .

Mae cyffuriau gwrthasid yn cael eu defnyddio i niwtraleiddio'r asid a thrwy hynny yn lleihau'r poen. Mae rhai cyffuriau gwrthasid yn cynnwys alcalïau i wrthweithio yn erbyn yr asid ac mae rhai efo cynhwysion sy'n amddiffyn wal y stumog neu yn rhwystro asid rhag ffoi o'r stumog i mewn i'r oesoffagws[3].

Mae cyffuriau gwrthasid ar gael dros y cownter mewn siopau ac archfarchnadoedd. Maent ar gael heb ragnodyn na phresenoldeb fferyllydd. Cymerir cyffuriau gwrthasid trwy'r geg a'r llwnc i leddfu dŵr poeth achlysurol yn gyflym. Dŵr poeth yw prif symptom adlif gastro-oesoffageal a diffyg traul. Mae triniaeth â gwrthasid ar ei ben ei hun yn symptomatig ac yn cael ei ddefnyddio ar gyfer mân symptomau yn unig.

Mae cyffuriau gwrthasid yn wahanol i gyffuriau sy'n lleihau asid megis gwrthweithyddion derbynnydd H2 neu atalyddion pwmp proton gan nid ydynt yn lladd y bacteria Helicobacter pylori, sy'n achosi'r rhan fwyaf o wlserau stumog.

Mathau o gyffuriau gwrthasid[golygu | golygu cod y dudalen]

  • alwminiwm hydrocsid
  • magnesiwm carbonad
  • magnesiwm trisilicate
  • magnesiwm hydrocsid
  • calsiwm carbonad
  • sodiwm bicarbonad

Bydd rhai o'r uchod yn cael eu cyfuno a'i gilydd mewn un ffisig.

Mae rhai brandiau o gyffuriau gwrthasid wedi eu blasu a mintys, sydd wedi ei ddefnyddio fel gwrthasid naturiol am ganrifoedd[4]. Gellir llunio gwrthasidau â chynhwysion gweithredol eraill megis simethicone i reoli fflatws neu alginad  (gel wedi ei wneud allan o wymon),  i weithredu fel rhwystr ffisegol i asid.

Sgil effeithiau[golygu | golygu cod y dudalen]

Fel rheol, nid oes gan gyffuriau gwrthasid lawer o sgil effeithiau os mai dim ond yn achlysurol y maent yn cael eu cymryd ac ar y dos a argymhellir. Ond weithiau gallant achosi dolur rhydd, rhwymedd, fflatws (gwynt) crampiau stumog, teimlo'n cyfoglyd, chwydu.

Cyfeiriadau[golygu | golygu cod y dudalen]

  1. NHS UK antacids adalwyd 21 Ionawr 2016
  2. Galw Iechyd Cymru - Diffyg traul adalwyd 21 Ionawr 2016
  3. Healthline - antacids adalwyd 21 Ionawr 2016
  4. Steps to health medicinal properties of mint adalwyd 21 Ionawr 2016


Cyngor meddygol

Sgrifennir tudalennau Wicipedia ar bwnc iechyd er mwyn rhoi gwybodaeth sylfaenol, ond allen nhw ddim rhoi'r manylion sydd gan arbenigwyr i chi. Mae llawer o bobl yn cyfrannu gwybodaeth i Wicipedia. Er bod y mwyafrif ohonynt yn ceisio osgoi gwallau, nid ydynt i gyd yn arbenigwyr ac felly mae'n bosib bod peth o'r wybodaeth a gynhwysir ar y ddalen hon yn anghyflawn neu'n anghywir.

Am wybodaeth lawn neu driniaeth ar gyfer afiechyd, cysylltwch â'ch meddyg neu ag arbenigwr cymwys arall!