Valentina Tereshkova

Oddi ar Wicipedia
Neidio i: llywio, chwilio
Valentina Tereshkova ar stamp Sofietaidd a gyhoeddwyd yn 1963 i ddathlu ei thaith ar Vostok 6.

Valentina Vladimirovna Tereshkova (Rwseg: Валенти́на Влади́мировна Терешко́ва; ganed 6 Mawrth 1937) yw'r ddynes gyntaf i deithio i'r gofod. Erbyn heddiw mae'r ofodwraig hon, un o kosmonauts enwocaf yr Undeb Sofietaidd, wedi ymddeol. Cafodd ei gwneud yn Arwr yr Undeb Sofietaidd, anrhydedd uchaf ei gwlad.

Gyrfa[golygu]

Yn enedigol o Oblast Yaroslavl, treuliodd ei phlentyndod ar fferm ei theulu. Cafodd ei dethol allan o dros bedwar cant ymgeisydd i beilotio'r cerbyd gofod Vostok 6 ar 16 Mehefin 1963 gan ennill ei lle mewn hanes fel yr ofodwraig gyntaf. Treuliodd dri diwrnod yn y gofod lle gwnaeth sawl prawf gwyddonol ar ei hun er mwyn casglu data ar berfformiad y corff dynol benywaidd yn y gofod.

Cyn cael ei recriwtio i fod yn kosmonaut, bu Tereshkova yn weithiwr mewn ffatri lian ac yn barasiwtydd amatur. Roedd hi'n rhan o grŵp o ofodwyr benywaidd yn rhaglen ofod yr Undeb Sofietaidd. Roedd hi'n beilot a major-general yn Llu Awyr yr Undeb Sofietaidd. Ar ôl 1969, pan ddaeth ei gyrfa fel kosmonaut i ben, daeth yn aelod gweithgar o Blaid Gomiwnyddol yr Undeb Sofietaidd, gan ddal sawl swydd wleidyddol. Ar ôl cwymp yr Undeb Sofietaidd ymddeolodd o fywyd gwleidyddol cyhoeddus ond mae'n arwr yn Rwsia o hyd.