Zorats Karer

Oddi ar Wicipedia
Jump to navigation Jump to search
Zorats Karer
Zorats Karer 2008, part of the stone circle.jpg
Mathsafle archaeolegol, cylch cerrig, stone row, priodwedd cenedlaethol Edit this on Wikidata
Daearyddiaeth
SirSisian Edit this on Wikidata
GwladBaner Armenia Armenia
Cyfesurynnau39.5507°N 46.0286°E Edit this on Wikidata

Safle archaeolegol yn Armenia yw Zorats Karer (hefyd Zorac' K'arer, Zorac Qarer, Zorakarer, Zorakar, Armeneg: Զորաց Քարեր), a leolir ger dinas Sisian yn ucheldiroedd talaith Syunik, yn ne-ddwyrain Armenia.

Disgrifiad[golygu | golygu cod y dudalen]

Un o'r meini sydd â thwll ynddo, yn y mur o gwmpas y safle.

Lleolir Zorats Karer ar ddarn o dir uchel creigiog yn y mynyddoedd ger Sistian. Ceir 223 beddrodau carreg mawr yn yr ardal. Archwilwyd y safle gan dîm o archaeolegwyr o'r Institut für Vorderasiatische Archäologie, Prifysgol München a chyhoeddwyd eu darganfyddiadau yn 2000. Daethont i'r casgliad y bu Zorats Karer "yn necropolis o ganol cyfnod Oes yr Efydd hyd Oes yr Haearn." Ychwanegant y gallai fod "yn noddfa ar adegau rhyfel", efallai yn y cyfnod Helenistaidd - Rhufeinig (tua 300 CC - 300 OC). Codwyd mur o gerrig a phridd cadarn oddi amgylch y safle gyda cherrig wedi'u gosod i mewn iddo i'w atgyfnerthu: erbyn heddiw dim ond y cerrig hyn sy'n weddill o'r mur hwnnw. Ceir tyllau crwn mewn tua 80 o'r meini hynny.[1]

Yn ninas Sisian ceir amgueddfa fechan lle arddangosir gwrthrychau archaeolegol o'r safle, sy'n cynnwys cerfiadau-ar-garreg (petroglyphs) hynafol o ogofâu yn y cylch, a nifer o wrthrychau a adawyd yn y beddrodau ar y safle.

Damcaniaethau ffug-archaeolegol[golygu | golygu cod y dudalen]

Mae'r tyllau yn y meini wedi bod yn destun sawl damcaniaeth ddadleuol gan ymchwilwyr archaeoseryddol Rwsiaidd ac Armeniaidd sydd wedi awgrymu bod y safle yn cael ei defnyddio ar gyfer seryddiaeth, yn bennaf am fod pedwar o'r tyllau yn cyfeirio at y man lle mae'r haul yn codi ar gyhydedd yr haf tra bod pedwar arall yn pwyntio at y man lle mae'r haul yn machlud ar y diwrnod hwnnw. Fodd bynnag, mae'n debygol fod y tyllau hynny yn ddiweddarach na'r cerrig a godwyd.[2]

Mae'r ymchwilwyr hyn yn cyfeirio at Zorats Karer wrth yr enw Carahunge (hefyd Karahoonj a sillafiadau tebyg), ar ôl y pentref o'r un enw gerllaw. Yn ôl y seryddwr Armeniaidd Paris Herouni, roedd Zorats Karer "yn deml gydag arsyllfa seryddol mawr a phrifysgol", ac mae'n honni hefyd fod y safle yn dyddio yn ôl tua 7600-4500 o flynyddoedd. Fodd bynnag, dydy Herouni ddim yn archaeolegwr ac mae ei waith cyhoeddedig ar y pwnc yn cynnwys nifer o honiadau sy'n perthyn i ffug-archaeoleg yn hytrach nag archaeoleg wyddonol, gonfensiynol.[3] Serch hynny, mae'n bennaf trwy waith Herouni fod Zorats Karer - wrth yr enw Carahunge - yn adnabyddus y tu allan i Armenia.

Cyfeiriadau[golygu | golygu cod y dudalen]

  1. "Institut für Vorderasiatische Archäologie, Prifysgol Munchen". Archifwyd o'r gwreiddiol ar 2007-12-23. Cyrchwyd 2009-07-27.
  2. Clive Ruggles, Ancient Astronomy, tud. 67
  3. "Gwefan lle ceir rhai o ddamcaniaethau Herouni". Archifwyd o'r gwreiddiol ar 2009-08-28. Cyrchwyd 2009-07-27.

Dolenni allanol[golygu | golygu cod y dudalen]