Tân The Station

Oddi ar Wicipedia
Jump to navigation Jump to search
20031113 Station Night Club Memorial@COMMONS.jpg
Cofeb dros dro i'r rhai a fu farw yn y tân, a godwyd ar hen safle The Station yn y misoedd wedi'r trychineb.
Data cyffredinol
Enghraifft o'r canlynolstructure fire, tân mawr Edit this on Wikidata
Dyddiad20 Chwefror 2003 Edit this on Wikidata
Lladdwyd100 Edit this on Wikidata
Dechreuwyd20 Chwefror 2003 Edit this on Wikidata
LleoliadWest Warwick, Rhode Island Edit this on Wikidata
GwladwriaethUnol Daleithiau America Edit this on Wikidata
RhanbarthRhode Island Edit this on Wikidata

Tân a ddinistriodd glwb nos The Station yn West Warwick, Rhode Island, Unol Daleithiau America, ar 20 Chwefror 2003 oedd tân The Station.[1] O'r 462 o bobl a oedd yn y clwb ar y pryd, bu farw 100 ac anafwyd 230 ohonynt.

Achoswyd y tân gan effeithiau pyrotechnegol yn ystod perfformiad gan y band roc Great White, ychydig wedi 11 o'r gloch yn y nos. Wedi i reolwr taith y grŵp, Daniel Biechele, danio'r tân gwyllt yn ystod y gân gyntaf, cafodd sbwng acwstig yn nenfwd a waliau'r clwb ei gynnau gan wreichion. Amgylchynwyd y llwyfan gan fflamau, ac ymhen un munud cynnyddodd y gwres ddigon i danio'r holl ddefnyddiau fflamadwy gerllaw. Ar y cychwyn, tybiodd y gynulleidfa taw rhan o'r sioe oedd y fflamau. Wrth i fwg du lenwi'r ystafell, ffoes y band drwy allanfa y tu ôl i'r llwyfan, a dechreuodd y dorf adael yr ystafell. Er yr oedd pedair ffordd allan i gyd, ceisiodd y mwyafrif o bobl ddianc drwy'r coridor cul a arweiniai at brif fynedfa'r clwb. Yn fuan iawn, llenwodd y cyntedd gyda phobl, ac achoswyd gwasgfa wrth iddynt wthio a rhuthro i ddianc o'r tân a'r mwg.

Naw mis wedi'r tân, cafodd perchnogion y clwb, y brodyr Jeff a Michael Derderian, a Daniel Biechele eu herlyn ar 200 o gyhuddiadau o ddynladdiad anfwriadol—dau gyhuddiad yr un am bob un a laddwyd, un am ddynladdiad drwy esgeulustod troseddol ac un am ddynladdiad drwy gamymddygiad. Cytunodd Biechele i bledio'n euog i 100 cyhuddiad o ddynladdiad drwy gamymddygiad, a'r brodyr Derderian i beidio â gwrthod y cyhuddiadau. Carcharwyd Biechele am ddwy flynedd, a Michael Derderian am dair blynedd.

Cyfeiriadau[golygu | golygu cod y dudalen]

  1. (Saesneg) The Station nightclub fire. Encyclopædia Britannica. Adalwyd ar 20 Gorffennaf 2022.