Silvina Ocampo

Silvina Ocampo
Ganwyd	Silvina Inocencia Ocampo Aguirre  28 Gorffennaf 1903, 28 Mehefin 1903  Buenos Aires
Bu farw	14 Rhagfyr 1993  Buenos Aires
Dinasyddiaeth	yr Ariannin
Galwedigaeth	ysgrifennwr, bardd, cyfieithydd
Arddull	barddoniaeth, nofel, stori fer
Priod	Adolfo Bioy Casares
Gwobr/au	Cymrodoriaeth Guggenheim, Gwobr Konex, Prif Anrhydedd y SADE, Premio Nacional de Letras de Argentina

Bardd a llenores straeon byrion yn yr iaith Sbaeneg a chyfieithydd ac arlunydd Archentaidd oedd Silvina Ocampo (28 Gorffennaf 1903 – 14 Rhagfyr 1993).

Ganwyd yn Buenos Aires, prifddinas yr Ariannin, i deulu cefnog. Un o'i chwiorydd hŷn oedd Victoria Ocampo, cyhoeddwr y cylchgrawn llenyddol Sur. Astudiodd Silvina baentio ym Mharis.

Priododd y llenor Adolfo Bioy Casares, yn 1940, a chawsant ferch o'r enw Marta yn 1954. Roedd yn gyfeillgar â nifer o feistri llên yr Ariannin yn yr 20g, gan gynnwys Jorge Luis Borges a Julio Cortázar. Cydweithiodd ar sawl gwaith â'i gŵr, gan gynnwys y gyfrol o straeon Los que aman, odian (1948). Ymhlith ei chyfrolau o farddoniaeth mae Poemas de amor desesperado (1949) ac Amarillo celeste (1972), ac ymhlith ei chasgliadau ffuglen mae Autobiografia de Irene (1959), La furia (1961), ac El Destino en las ventanas (1987). Cyfieithiodd waith nifer o lenorion Americanaidd i'r Sbaeneg, gan gynnwys Emily Dickinson, Edgar Allan Poe, ac Herman Melville.

Cydweithiodd Ocampo, Bioy Casares, a Borges wrth olygu Antología de la literatura fantástica (1940) ac Antología poética argentina (1941).

Bu farw yn Buenos Aires yn 90 oed.