Rosalind Lloyd

Rosalind Lloyd
Rosalind Lloyd
	Rosalind gyda Dewi Pws ym y pantomeim Mawredd Mawr
Ffugenw	Ros
Ganwyd	Rosalind Lloyd; 17 Gorffennaf 1947; Llanbedr Pont Steffan
Dinasyddiaeth	Cymraes
Galwedigaeth	cantores, cerddor ac actores
Cysylltir gyda	Rosalind a Myrddin

Un hanner o'r ddeuawd boblogaidd Rosalind a Myrddin yw'r gantores a'r cerddor Rosalind Lloyd neu Rosalind Owen (ganed 17 Gorffennaf 1947). Cyn iddi gwrdd â'i gŵr Myrddin Owen, gwnaeth enw iddi'i hun fel artist unigol ac aelod o'r grŵp Y Perlau. Ymddangosodd ar y gyfres boblogaidd Opportunity Knocks yn y 1970au a bu'n cyd-gyflwyno'r gyfres Sion a Siân gyda Dai Jones ar S4C. Teithiodd y byd yng nghwmni ei gŵr ac aelodau eraill o Hogia'r Wyddfa, gan ddiddanu'r gynulleidfa gyda'r delyn a'r gitâr. Fe'i hadnabu hefyd fel "Telynores Dulas".^[1] Bu'n rhan o sawl cynhyrchiad ar lwyfan gyda Cwmni Theatr Cymru fel y pantomeim Mawredd Mawr yn ogystal â cynhyrchiadau o ddramâu cerdd Gŵyl Fai Pwllheli, lle bu'n byw am nifer o flynyddoedd.

Gyrfa

Ganwyd Rosalind yn Llanbedr Pont Steffan yn ferch i John a Muriel Lloyd. Fe'i magwyd ar aelwyd gerddorol.

Roedd ei thadcu yn gerddor, yn arweinydd partïon a chymanfaoedd ac yn meddu ar lais tenor hyfryd. Roedd ei mam yn athrawes piano ac yn gantores adnabyddus yn ei dydd, yn gystadleydd cyson ynghyd â’i chwaer mewn eisteddfodau led led y canolbarth.^[2]

Ymunodd â’r Urdd a Chlwb Ffermwyr Ieuanc Felinfach, pryd y cafodd gyfle i ganu fel unigolyn, fel un o ddeuawd, ac fel aelod o bartïon a chorau. Roedd y capel yn fan pwysig i’w theulu ac i Rosalind ac yno y cafodd brofiadau ychwanegol yn y maes canu a diddori.^[2]

Bu'n gweithio mewn swyddfa cyfreithiwr, ac yn ddiweddarach yn siop ei rhieni, lle y cafodd fwy eto o ryddid i ymarfer ei dawn gerddorol ar y piano a’r delyn a chanu cerdd dant. Ymunodd â Chôr Coleg Dewi Sant, Llambed.^[2]

Erbyn y 1970au, roedd Rosalind yn ddigon hyderus i wynebu sialensau heriol fel unawdydd. Mentrodd gystadlu ar y rhaglen boblogaidd, Opportunity Knocks, a llwyddo i ennill sawl tro a hynny drwy ganu yn y Gymraeg.^[2] Yn dilyn y llwyddiant, daeth cyfleoedd i’w rhan ar raglenni HTV Cymru a’r BBC. Bu'n cyd-gyflwyno'r rhaglen boblogaidd Sion a Siân gyda Dai Jones.

Cyhoeddwyd ei record gyntaf fel unigolyn Llais swynol Rosalind Lloyd ym 1970 gyda Recordiau Cambrian.^[1] Roedd y record honno yn cynnwys 4 cân wedi'u cyfansoddi gan Rosalind a'i mam.^[1]

Bu'n perfformio ar lwyfannau a'r sgrin deledu yng Nghymru gyda enwogion y cyfnod megis Tony ac Aloma, Hogia'r Wyddfa, Doreen Lewis, Emyr ac Elwyn, Beryl Hall, Hogia Llandegai, Dafydd Iwan a Dewi Pws Morris.

Mae'n briod gyda Myrddin Owen ers 1972 ac mae ganddynt un mab, Deian.[1]