Rhwydo/Vangst

Rhwydo/Vangst

Enghraifft o:	theatr arbrofol tairieithog
Gwlad	Cymru, Yr Iseldiroedd
Iaith	Cymraeg, Iseldireg, Saesneg
Dynodwyr

Darn o theatr arbrofol teir ieithog wedi ei greu gan Roos van Geffen, ac yn gyd gynhyrchiad rhwng Stichting Immens a Theatr Genedlaethol Cymru yn 2013, oedd Rhwydo/Vangst. Cyfunwyd yr ieithoedd Iseldireg, Cymraeg a Saesneg i greu'r sioe, gydag Angharad Price yn gyfrifol am y cyfieithiad Cymraeg a Leisa Mererid yng ngofal y lleisiau Cymraeg a Saesneg. Roos van Geffen oedd yng ngofal y cysyniad, y cyfarwyddo a chynllunio, gyda Yvonne Franquinet yng ngofal y dramatwrgiaeth.

Cynnwys

Disgrifir y cynhyrchiad ar wefan Theatr Genedlaethol Cymru fel "Cynhyrchiad theatr gorfforol amlieithog"

"Bu Roos yn nodi dyheadau ac ofnau pobl ar draws Ewrop, gan ddefnyddio’r straeon personol hyn i greu darn o waith didwyll a thelynegol sy’n treiddio i hanfod y bod dynol. Bydd yn gwau iddo ddyheadau ac ofnau a gesglir ar hyd a lled Cymru yn ystod y daith."

Cefndir

Cyflwynwyd y gwaith o dan gyfnod Arwel Gruffydd fel arweinydd artistig Theatr Genedlaethol Cymru. Ariannwyd y prosiect gan Gyngor Celfyddydau Cymru a'r Loteri Genedlaethol ynghyd â Fonds Podiumm Kunsten o'r Iseldiroedd. Roedd y cynhyrchiad yn gyd-gynhyrchiad cyntaf i Theatr Genedlaethol Cymru gyda chwmni o Ewrop, wedi i Gruffydd brofi'r sioe wreiddiol yng Ngwyl Oerol rhanbarth Friesland yr Iseldiroedd, gan benderfynu y gallai’r darn gael ei addasu’n rhwydd i’r Gymraeg.

Cynyrchiadau nodedig

Llwyfannwyd y cynhyrchiad deirgwaith yng Nghymru, ar Yr Hen Lawnt Fowlio ym Mangor a Chanolfan y Mileniwm, Caerdydd, cyn perfformio yn Eisteddfod Genedlaethol Sir Ddinbych yn 2013.

"Ces fy nenu a nieithrio gan Rhwydo/Vangst" yn ôl yr adolygydd theatr Lowri Haf Cooke, "...a nid drwg o beth mo hynny. Alla i ddim dweud yn onest i mi “joio mas draw” ond ces fy nghyffwrdd yn bur annisgwyl. Fel gwaith celf gain neu atgof prudd, ceir yma le i aflonyddu’r enaid," ychwanegodd.