Parciau Brenhinol

Y Parciau Brenhinol

Math	asiantaeth lywodraethol
Daearyddiaeth
Rhan o'r canlynol	Llywodraeth y Deyrnas Unedig
Gwlad	Lloegr

Mae'r Parciau Brenhinol yn dir yn Llundain a ddefnyddiwyd yn wreiddiol gan brenhin Lloegr a'i deulu ar gyfer hamdden, hela yn bennaf. Mae’r parciau’n aros yn eiddo i’r Goron, gyda’r Ysgrifennydd Gwladol dros yr Adran Ddigidol, Diwylliant, Cyfryngau a Chwaraeon yn gyfrifol amdanynt. Maen nhw'n cael eu rheoli gan The Royal Parks, elusen sy'n rheoli hefyd ardaloedd eraill o barcdir yn Llundain. Crëwyd yr elusen fel cwmni cyfyngedig trwy warant ym Mawrth 2017 ac fe’i lansiwyd yn swyddogol yng Ngorffennaf 2017.

Yn wreiddiol roedd y brenin a'i deulu'n defnyddio'r parciau fel tiroedd hela. Yn y 16g amgaeodd Harri VIII diroedd i'r gogledd o Balas Whitehall ar gyfer yr hyn sydd bellach yn St James's Park a'r Green Park. Cymerodd hefyd o Abaty Westminster y tir a ddaeth yn Hyde Park a Gerddi Kensington. Gan ddechrau gyda Hyde Park, a agorwyd i'r cyhoedd gan Charles II ym 1673, dros y blynyddoedd mae'r cyhoedd wedi cael mynediad rhydd i'r mannau hyn.

Mae'r wyth parc brenhinol fel a ganlyn (yn ôl y bwrdeistrefi yn Llundain y maent yn sefyll ynddynt).

• Bwrdeistref Frenhinol Greenwich
  • Greenwich Park, 74 hectar (180 erw)

• Bwrdeistref Llundain Richmond Upon Thames
  • Bushy Park, 445 hectar (1,100 erw)
  • Richmond Park, 955 hectar (2,360 erw)

• Dinas Westminster
  • The Green Park, 16 hectar (40 erw)
  • Hyde Park, 140 hectar (350 erw)
  • St James's Park, 23 hectar (57 erw)

• Dinas Westminster a Bwrdeistref Frenhinol Kensington a Chelsea
  • Gerddi Kensington, 107 hectar (260 erw)

• Dinas Westminster a Bwrdeistref Llundain Camden
  • The Regent's Park a Bryn y Briallu, 166 hectar (410 erw)

Dolenni allanol

• Gwefan swyddogol