Neidio i'r cynnwys

Llofruddiaethau Southport

Oddi ar Wicipedia
Llofruddiaethau Southport
Enghraifft o:trywanu torfol Edit this on Wikidata
Dyddiad29 Gorffennaf 2024 Edit this on Wikidata
LladdwydEdit this on Wikidata
LleoliadSouthport Edit this on Wikidata
Map
Gwladwriaethy Deyrnas Unedig Edit this on Wikidata
RhanbarthSouthport Edit this on Wikidata

Achos o drywanu torfol yn Southport, Glannau Merswy, Lloegr, oedd llofruddiaethau Southport a gyflawnwyd gan Axel Rudakubana ar 29 Gorffennaf 2024, gan ladd tair merch ifanc ac anafu wyth merch arall a dau oedolyn.

Bachgen 17 oed ar y pryd oedd Axel Muganwa Rudakubana, a aned yng Nghaerdydd i rieni o Rwanda, ac a drigodd ym mhentref Banks, Swydd Gaerhirfryn, ar gyrion Southport. Cynlluniodd i dargedu'r Hart Space, stiwdio ddawns yn ardal Meols Cop, Southport, a oedd yn cynnal gweithdy ioga a dawns gyda cherddoriaeth Taylor Swift ar gyfer 26 o blant. Cyrhaeddodd yr adeilad mewn tacsi, ac aeth ati i drywanu'r merched yn gyflym ac yn ddi-ball. Ymosododd hefyd ar ddau oedolyn a geisiodd amddiffyn y plant: Leanne Lucas, un o drefnwyr y gweithdy, a Jonathan Hayes, gweithiwr swyddfa yn yr un adeilad. Bu farw dwy ferch yn y fan, ac un wedi diwrnod yn yr ysbyty. Wedi i'r heddlu gyrraedd, cafodd Rudakubana ei arestio a'i gyhuddo o dair llofruddiaeth, deg ymgais i lofruddio, a meddiant ar wrthrych miniog. Yn hwyrach cafodd ei gyhuddo o dorri Deddf Arfau Biolegol 1974 drwy feddu ar risin, a Deddf Terfysgaeth 2000 am feddu ar astudiaeth filwrol o ddogfen hyfforddi al-Qaeda. Plediodd Rudakubana yn euog i bob un o'r 16 o gyhuddiadau yn ei erbyn ar 20 Ionawr 2025, pan oedd disgwyl i'w dreial gychwyn.[1] Tridiau'n ddiweddarach, cafodd ei ddedfrydu i garchar am oes ac i fwrw o leiaf 52 mlynedd yn y carchar. Datganodd y barnwr nad oedd modd iddo roi tariff llawn oes i Rudakubana oherwydd nad oedd eto yn 18 oed pan gyflawnwyd y troseddau.[2]

Trannoeth y drosedd, ymgynulliodd torf yn Southport a wrthdarodd â'r heddlu, a chafodd mosg yn y dref ei ddifrodi yn sgil camwybodaeth am hunaniaeth y llofrudd. Yn yr wythnos i ddod, ymledodd protestiadau a therfysgoedd ar draws Lloegr, ac ym Melffast yng Ngogledd Iwerddon.

Cyfeiriadau

[golygu | golygu cod]
  1. "Dyn o Gaerdydd yn pledio'n euog i lofruddio tair merch yn Southport", BBC (20 Ionawr 2025). Adalwyd ar 23 Ionawr 2025.
  2. "O leiaf 52 mlynedd o garchar i ddyn o Gaerdydd am lofruddio tair merch", BBC (23 Ionawr 2025). Adalwyd ar 23 Ionawr 2025.