Giovanni Della Casa

Giovanni Della Casa
Portread o Giovanni Della Casa gan Pontormo (1541–44).
Ganwyd	28 Mehefin 1503  Mugello
Bu farw	14 Tachwedd 1556  Rhufain, Montepulciano
Alma mater	Prifysgol Bologna Prifysgol Fflorens
Galwedigaeth	llenor, offeiriad, bardd, diplomydd
Swydd	archesgob Catholig, esgob, llysgennad y pab

Bardd, esgob, a diplomydd Eidalaidd oedd Giovanni Della Casa (28 Mehefin 1503 – 14 Tachwedd 1556) sydd yn nodedig am ei lyfr cwrteisi Il Galateo (1558).

Bywgraffiad

Ganed ef yn Villa La Casa ger Borgo San Lorenzo ym Mugello, rhanbarth hanesyddol yng ngogledd Toscana, a oedd yn rhan o Weriniaeth Fflorens. Astudiodd ym mhrifysgolion Bologna, Fflorens, Padova, a Rhufain. Fe'i penodwyd yn Archesgob Benevento ym 1544 ac aeth i Fenis fel llysgennad y Pab Pawl III. Ym 1555 fe'i penodwyd yn ysgrifennydd gwladol gan y Pab Pawl IV, ac y flwyddyn olynol bu farw ym Montepulciano, Gweriniaeth Siena, yn 53 oed.

Gwaith

O ran barddoniaeth, cyfansoddodd Giovanni Della Casa delynegion yn bennaf, ac yn ei ieuenctid ysgrifennai benillion dychanol yn null Francesco Berni. Ysgrifennodd hefyd weithiau gwleidyddol, gan gynnwys Orazioni politiche. Ei waith enwocaf ydy'r traethawd Il Galateo ar bwnc moesau, a ysgrifennwyd rhwng 1550 a 1555. Cyhoeddwyd Il Galateo yn gyntaf ym 1558.