Bob Denard

Oddi ar Wicipedia
Neidio i: llywio, chwilio
Bob Denard
Ganwyd 7 Ebrill 1929 Edit this on Wikidata
Bordeaux Edit this on Wikidata
Bu farw 13 Hydref 2007 Edit this on Wikidata (78 oed)
Paris Edit this on Wikidata
Galwedigaeth Hurfilwr Edit this on Wikidata

Milwr hur o Ffrancwr oedd Bob Denard (7 Ebrill 1929 - 13 Hydref 2007), efallai yr enwocaf o filwyr hur yr 20g.

Ganed ef yn Bordeaux, Aquitaine fel Gilbert Bourgeaud. Defnyddiai ef ei hun yr enw "Cyrnol Denard", a defnyddiai hefyd yr enw "Said Mustapha Mahdjoub". Gwasanaethodd yn y Fyddin Ffrengig yn Rhyfel Cyntaf Indo-Tsieina ac yn Algeria ac fel plismon yn Morocco cyn troi'n filwr hur yn y 1960au. Bu ganddo ef a'r milwyr oddi tano ran mewn rhyfeloedd neu ymgais i wrthdroi'r llywodraeth yn Biafra, Gabon, Angola, Zaire, Zimbabwe, Benin, Gogledd Yemen ac Iran.

Cysylltir ef yn arbennig ag ynysoedd Comoros, lle bu a rhan mewn pedair ymgais i wrthdroi'r llywodraeth. Wedi iddi orfodi'r Arlywydd Ahmed Abdallah o'i swydd yn 1975, cynorthwyodd ef i ennill grym yn ôl yn 1978, gyda dim ond 50 o filwyr. Arhosodd ef a 30 o filwyr fel gwarchodlu personol Ahmed Abdallah, a daeth yn ddinesydd y Comoros. I bob pwrpas, Denard oedd yn rheoli. Pan ddaeth François Mitterrand yn Arlwydd Ffrainc yn 1981, collodd Denard gefnogaeth Ffrainc. Yn 1989 bu cweryl yn y Comoros, a lladdwyd yr arlywydd Ahmed Abdallah. Ystyrid bod Denard yn gyfrifol, a chymerodd Ffrainc ef i'r ddalfa yn 1991. Yn 1993 dedfrydodd llys ym Mharis ef i bum mlynedd o garchar am ei ran mewn ymgais i wrthdroi llywodraeth Benin yn 1977.

Ceisiodd Denard gipio grym yn y Comoros unwaith eto yn 1995, ond gyrrodd Jacques Chirac filwyr i gefnogi'r llywodraeth. Yn 1999 rhoddwyd ef ar ei brawf ym Mharis am lofruddio Ahmed Abdallah, ond oherwydd diffyg prawf, cafwyd ef yn ddieuog. Bu'n briod a chwech o ferched a bu ganddo saith o blant.