Azemmour
 | |
| Math | urban commune of Morocco, commune of Morocco  |
|---|---|
| Poblogaeth | 40,920 |
| Daearyddiaeth | |
| Sir | Talaith El Jadida |
| Gwlad |  Moroco |
| Gerllaw | Oum Er-Rbia |
| Cyfesurynnau | 33.28°N 8.33°W |
 | |
Dinas ym Moroco yw Azemmour neu Azamor (Arabeg: أزمور; o'r gair Tifinagh azemmur, "yr Olewydd"). Fe'i lleolir ar lan yr afon Oum Er-Rbia, tua 75 km i'r de-orllewin o Casablanca ger El Jadida, yng ngorllewin canolbarth Moroco. Mae'n rhan o ranbarth Doukhala-Abda. Poblogaeth: tua 40,000.
Ceir traeth braf, sef Azemmour Plage (Traeth Azemmour) ar lan y Cefnfor Iwerydd tua 2 filltir o'r ddinas ei hun. Mae aber yr Oum Er-Rbia, un o afonydd mwyaf Moroco sy'n tarddu ym mynyddoedd yr Atlas, yn denu nifer o adar mudol.
Hanes[golygu | golygu cod]
Mae'n debygol mai dyma oedd safle dinas Azama, a sefydlwyd gan y Ffeniciaid. Daeth yn ddinas o bwys yn nheyrnas y Berberiaid yn ne Moroco yn yr Oesoedd Canol. Meddianwyd y ddinas am gyfnod byr iawn gan y Portiwgalwyr (1513-41); roedd y fforiwr enwog Ferdinand Magellan yn un o arweinwyr y Portiwgalwyr. Erys y castell a godwyd hyd heddiw.
Yma yn ymyl Azemmour, yn ôl traddodiad, ger aber yr Oum Er-Rbia, y cyrhaeddodd y cadfridog Islamaidd Oqba ibn Nafi "Fôr y Gorllewin" yn y flwyddyn 681, ar ôl carlam gwyllt dros Foroco yn agor y ffordd i'r goresgyniaid Arabaidd-Fwslemaidd o'r wlad Ferber. Portreadir y ddinas a'r cyfnod yn y nofel Ffrangeg La Mère du Printemps, gan Driss Chraïbi, brodor o'r ardal a Berber.