Seithenyn

Roedd Seithenyn yn arglwydd a gysylltir â Chantre'r Gwaelod, yr ardal ym Mae Ceredigion (mewn rhai fersiynau mae'r lleoliad yn wahanol) a foddwyd gan y môr yn y 6ed ganrif, yn ôl traddodiad llên gwerin.

Yn ôl un traddodiad, ei feibion oedd y seintiau Tudno a Gwynhoedl.

Yn y chwedl am Gantre'r Gwaelod mae Seithenyn yn geidwad y llifddorau yn llys Gwyddno Garanhir. Un noson dymhestlog bu gwledda mawr yn y llys ac anghofiodd Seithenyn, oedd yn feddw, i edrych y llifddorau a'u cau rhag y môr. Oherwydd ei esgelusdod boddwyd trigolion Cantre'r Gwaelod i gyd, namyn y brenin ei hun.

Cyfeirir at Seithenyn yn y gerdd Boddi Maes Gwyddneu yn Llyfr Du Caerfyrddin. Ar ddechrau'r gerdd mae'n cael ei orchmynu i edrych allan i weld rhuthr y môr, ond roedd eisoes yn rhy hwyr. Ar ddiwedd y testun ceir un o Englynion y Beddau (orgraff ddiweddar):

Bedd Seithenyn, synhwyr wan,

Rhwng Caer Cenedyr a glan -- môr;

Mawrhyddig o gynran.

Darllen pellach

• A.O.H. Jarman (gol.), Llyfr Du Caerfyrddin (Caerdydd, 1982)
• F.J. North, Sunken Cities (Caerdydd, 1957)

Mae'r erthygl hon yn Eginyn. Gallwch helpu Wicipedia drwy ei datblygu.