Ray Gravell

Roedd Ray William Robert Gravell, (3 Medi 1951-30 Hydref 2007), yn chwaraewr rygbi a gyflwynydd radio gyda'i raglen ei hun, gan wneud sylwadau ar rygbi ar y cyfryngau hefyd. Ganwyd ef ym Mynydd-y-garreg lle cafodd ei addysg gynradd cyn mynd i Ysgol Gyfun Porth Tywyn ac wedyn i Ysgol Ramadeg y Bechgyn. Roedd e'n byw ym Mynydd-y-garreg ger Cydweli gyda'i wraig Mari a'i ddwy ferch mewn stryd a enwyd ar ei ôl, sef Heol Ray Gravell.

Chwaraeodd rygbi dros Lanelli, Cymru a'r Llewod, gan gael hyfforddiant gan Carwyn James. Ef oedd Llywydd Clwb y Strade. Yn wladgarwr pybur roedd e'n edmygydd mawr o Dafydd Iwan. Actiodd hefyd gan gynnwys rhan fel Owain Glyndŵr ar y teledu, ac yn gyflwynydd radio.

Gyrfa Rygbi

Chwaraeodd Ray Gravell i Lanelli fel canolwr rhwng 1969 ac 1985, lle roedd yn gapten rhwng 1980 ac 1982. Yn ystod ei yrfa, fe enillodd 23 cap dros Cymru ac fe aeth ar daith Y Llewod yn 1980.

Clefyd y Siwgr

Cyhoeddwyd ar 18 Ebrill 2007 y byddai rhaid iddo ddychwelyd i Ysbyty Glangwili yn dilyn llawdriniaeth i gael dau fys ei draed bant o ganlyniad i haint yn gysylltiedig â clefyd y siwgr ac bu rhaid iddo golli ei goes dde o dan y benglin. Cafodd fynd adre ar y cyntaf o Fai.

Marwolaeth

Farwodd yn sydyn ar 30 Hydref 2007 pan oedd e ar ei wyliau yn Sbaen. [1]

Eginyn erthygl sydd uchod am Gymro neu Gymraes. Gallwch helpu Wicipedia drwy ychwanegu ato.