Andreas Vesalius

Oddi ar Wicipedia
Jump to navigation Jump to search
Portread o Vesalius yn ei De Humani Corporis Fabrica (1543)

Anatomydd a meddyg o Fflandrys oedd Andreas Vesalius (Lladineiddio o'r enw Iseldireg Andries van Wesel) (31 Rhagfyr 151415 Hydref 1564). Roedd yn awdur llyfr dylanwadol ar anatomeg, De Humani Corporis Fabrica (Basel, 1543).

Fe'i ganwyd ym Mrwsel. Astudiodd ym Mhrifysgol Leuven (1528-32), ym Mhrifysgol Paris (1533-7) ac ym Mhrifysgol Padova, Gweriniaeth Fenis (1537). Yn syth ar ôl iddo gael ei ddoethuriaeth yn Padova, penodwyd ef yn athro llawdriniaeth ac anatomeg yno.

Ar ôl ei ymchwiliadau ei hun, fe ddaeth i'r casgliad bod llawer o ddamcaniaethau ffisiolegol hynafol Galen yn anghywir. Cynhwyswyd ei ddarganfyddiadau yn ei lyfr De Humani Corporis Fabrica, a gyhoeddodd pan oedd yn 28 mlwydd oed.

Yn fuan wedi cyhoeddi ei lyfr, penodwyd ef yn feddyg yn llys Siarl V, Ymerawdwr Glân Rhufeinig, ac yn ddiweddarach gwasanaethodd ei fab Philip II.

Yn ystod bererindod i'r Tir Sanctaidd ym 1564 bu farw pan gafodd ei longddryllio ar ynys Zakynthos.