Adulam

Oddi ar Wicipedia
Jump to navigation Jump to search
Adulam
Hill of Adullam, Covered in Pines.jpg
Math safle archaeolegol Edit this on Wikidata
Daearyddiaeth
Sir Shfela Edit this on Wikidata
Gwlad Israel Edit this on Wikidata
Cyfesurynnau 31.6547°N 35.0031°E Edit this on Wikidata

Hen ddinas yng Nghanaan oedd Adulam a saif rhyw 36 kilometre (22 mi) i dde-orllewin Jeriwsalem, yn debyg ar fryn Tel ʿAdullam, neu H̱orbat ʿAdullam (Arabeg: Tall Ash-Shaykh Madhkūr‎).[1]

Sonir am Abdulam gyntaf yn Llyfr Genesis 38, yn lleoliad i weithgareddau Jwda, mab Jacob. Yn sgil ymadawiad yr Iddewon o'r Aifft a'r goncwest dros Dir Israel, dosrennid Adulam i lwyth Juda, yn ôl Llyfr Josua 15:35. Fe'i gelwid "Gogoniant Israel" yn Llyfr Micha 1:15. Yn ôl Llyfr Cyntaf Samuel 22:1–4, yma y bu Dafydd a'i ddilynwyr mewn ogof wedi iddynt ffoi o'r Brenin Saul. Wedi cwymp y deyrnas Iddewig unedig yn y 10g CC, codwyd amddiffynfeydd Adulam gan Rehoboam, brenin cyntaf Jwda, a gorchfygwyd Abdulam a chaerau eraill Jwda gan y Pharo Sheshonk I (Shishak). Ailfeddiannwyd Adulam gan yr Iddewon wedi'r Gaethglud yn y 6g CC. Cipiwyd y ddinas oddi ar y cadfridog Gorgias gan Judas Maccabeus yn ystod y gwrthryfel Hasmoneaidd yn yr 2g CC (2 Maccabees 12:38).

Yn yr oes fodern, rhoddir yr enw ʿAdullam gan Wladwriaeth Israel ar ranbarth datblygu a saif yn yr ardal a elwir coridor Jeriwsalem, i orllewin y brifddinas hawliedig, yng nghanolbarth y wlad. Mae'r rhanbarth bryniog hwn yn cynnwys olion y ddinas hynafol rhwng iseldiroedd y Shfela a Mynyddoedd Jwdea. Dechreuwyd gwladychu'r rhanbarth yn 1958 drwy sefydlu sawl pentref amaethyddol. Ni chodwyd canolfan ranbarthol oherwydd bod yr ardal mor agos i Jeriwsalem, ond lleolir y pentrefi o amgylch tair is-ganolfan wledig. Tyfir perllannau yng ngogledd-ddwyrain ʿAdullam a chnydau yn ne-orllewin yr ardal. Mae ambell bentref hefyd yn cynhyrchu gwneuthurion bychain.[1]

Gweler hefyd[golygu | golygu cod y dudalen]

Cyfeiriadau[golygu | golygu cod y dudalen]

  1. 1.0 1.1 (Saesneg) ʿAdullam. Encyclopædia Britannica. Adalwyd ar 1 Ionawr 2020.