Llyfr y Cysgodion

Oddi ar Wicipedia
Neidio i: llywio, chwilio
Mae'r erthygl hon yn disgrifio'r llyfr traddodiadol o Wica; am ddefnyddiau eraill, gweler Book of Shadows.
Enghraifft o Lyfr y Cysgodion gyda phentagl wedi'i argraffu ar y clawr blaen.

Enw a ddefnyddir am lyfr sy'n cynnwys swynion a thestunau crefyddol y grefydd Wica a rhai traddodiadau neo-Baganaidd eraill ydyw Llyfr y Cysgodion (Saesneg: Book of Shadows). Yn draddodiadol, y mae Llyfr y Cysgodion yn cynnwys defodau craidd, moeseg, ac athroniaeth Wica, ynghyd â rhestr o swynion personol y perchennog.

Yn Wica Traddodiadol Prydeinig, sydd yn cylchdroi'n fawr o gwmpas fframwaith y cwfen, copiir y llyfr mewn llawysgrifen aelod newydd y cwfen, gan ddilyn llyfr yr Archoffeiriaid neu offeiriades.

Ceir sawl fersiwn o Lyfr y Cysgodion, gyda'i gynnwys yn amrywio o berson i berson o'r llyfr gwreiddiol Gerald Gardner.

Hanes[golygu]

Llun du a gwyn o Lyfr y Cysgodion Gardner.[1]

Tarddiadau[golygu]

Cyflwynodd Gardner Llyfr y Cysgodion i aelodau newydd ei gwfen yn y 1950au. Dywedodd mai llyfr coginio o swynion ydyw; gallasant gopïo ei lyfr efe ac ychwanegu neu dynnu cynnwys yn ôl yr angen. Dywedodd yr oedd yr arfer o gadw'r fath lyfr yn un hynafol a wnaethpwyd gan wrachod ers talwm. Yn ôl y traddodiad, dywedodd Gardner y dyler llosgi'r llyfr ar ôl i'r perchennog farw.

Ni soniodd Gardner am "Lyfr y Cysgodion" yn ei nofel High Magic's Aid (1949) ynglŷn â gwrachod y canol oesoedd. Hawliodd Doreen Valiente (Archoffeiriades Gardner) y nad oedd Gardner eto wedi dyfeisio'r syniad o "Lyfr y Cysgodion" pryd hynny, ond ffurfiodd efe'r term ar ôl iddo ysgrifennu ei nofel.

Dywedodd hi y daeth Gardner o hyd i'r term mewn cylchgrawn o'r enw The Occult Observer (Cyfrol I, Rhif 3, 1949). Yr oedd hysbyseb yn y rhifyn, dywedodd hi, am nofel Gardner, High Magic's Aid, ac wrth ei ochr yr oedd erthygl o'r enw "Llyf y Cysgodion" gan Mir Bashir. Yr oedd yr erthygl dan sylw yn sôn am lawlyfr darogan Sansgrit hynafol, a eglurodd sut mae rhagweld pethau drwy arsylwi cysgod rhywun.[1] Tybiodd Valiente y derbyniodd Gardner y term hwn am ei lyfr swynion.

Tudalen o Ye Booke of Ye Art Magical.

Darganfuwyd llawysgrif a rwymwyd mewn lledr yn llawysgrifen Gardner o'r enw Ye Booke of Ye Art Magical (mae Ronald Hutton yn dweud mai Ye Bok oedd yr enw arno, ond Ye Booke yn ôl Valiente) ymysg ei bapurau ar ôl iddo farw. Ymddengys mai drafft cyntaf o Lyfr y Cysgodion Gardner ydyw, gydag adrannau ynglŷn â defodau'r OTO a ddyfeisiwyd gan yr ocwltwr Aleister Crowley[2]. Cafodd Gardner afael ar y defodau hyn ym 1946, wrth iddo brynu siarter oddi wrth Crowley yn rhoi'r hawl iddo berfformio defodau'r OTO.

Gweler hefyd[golygu]

Cyfeiriadau[golygu]

  1. 1.0 1.1 Valiente, Doreen (1989). The Rebirth of Witchcraft. Hale
  2. The Rebirth of Witchcraft, Doreen Valiente, tudalen 58

Dolenni allanol[golygu]