Gillian Elisa
| Gillian Elisa | |
|---|---|
| Ganwyd | 10 Awst 1953  Caerfyrddin |
| Dinasyddiaeth |  Cymru |
| Alma mater |
|
| Galwedigaeth | actor, digrifwr, canwr |
Actores, digrifwraig a chantores o Gymraes yw Gillian Elisa (ganwyd 10 Awst 1953). Daeth yn adnabyddus am chwarae Sabrina yn Pobol y Cwm ac am ei chymeriadau comedi.
Bywyd cynnar ac addysg[golygu | golygu cod]
Ganwyd Gillian Elizabeth Thomas yng Nghaerfyrddin a magwyd yn Llanbedr Pont Steffan. Mynychodd Ysgol Gyfun Llanbedr Pont Steffan a Choleg Cerdd a Drama Cymru yng Nghaerdydd.[1]
Yn ferch ifanc dangosodd ddiddordeb mewn diddanu eraill, o flaen ei theulu ac mewn Eisteddfodau lleol. Yn y chweched dosbarth cyd ysgrifennodd sioe gerdd Yr Enfys a'i phrofiad cyntaf ym myd actio oedd chwarae rhan Poli Gardis mewn cynhyrchiad cynnar o Dan y Wenallt. Yn y 1970au roedd hefyd yn aelod o'r grŵp roc, Graffia gan ennill ei lle fel prif gantores y band.
Gyrfa[golygu | golygu cod]
Wedi cwblhau ei chwrs coleg, cafodd cynnig y brif ran yn Nrama Gomisiwn yr Eisteddfod Genedlaethol yng Nghaerfyrddin yn 1974, yn chwarae Nimue yn Dewin Y Daran. Yn Hydref 1974, ymunodd â chast y gyfres ddrama newydd Pobol y Cwm ar BBC Cymru, yn chwarae'r cymeriad Sabrina Harries. Hi oedd aelod ieuengaf y cast ac fe barhaodd yn y rhan am ddeng mlynedd. Yn 1975 chwaraeodd ran Branwen yn yr opera roc Melltith ar y Nyth.[2]
Ers hynny cafodd rhannau mewn sawl cyfres deledu ar S4C, gan gynnwys Dinas, Minafon a Yr Heliwr, Glan Hafren, Iechyd Da. Bu hefyd yn chwarae cymeriadau mewn rhaglenni comedi Cymraeg fel Ma 'Ifan 'Ma ac Eric. Yn y Saesneg, cafodd rhannau amlwg mewn cyfresi megis Mortimer's Law, Forever Green, A Mind to Kill a Belonging.
Mae hefyd yn adnabyddus am ei pherfformiadau comedi ar raglenni adloniant fel Noson Lawen, ac yn arbennig am ei chymeriad unigryw 'Mrs OTT'. Yn 2004 perfformiodd y cymeriad yn rhan o sioe un-fenyw yng Ngŵyl Caeredin.[3]
Ers 2011 bu'n dirprwyo ar gyfer rhan 'Grandma' yn sioe gerdd Billy Elliot yn West End Llundain ac yn Ionawr 2015 cymerodd y brif ran wedi i Ann Emery ymddeol o'r sioe.[4]
Fel cantores, mae wedi rhyddhau sawl albwm yn ogystal â chyfrannu at recordiadau eraill.
Disgograffi[golygu | golygu cod]
- Rhywbeth yn y Glas
- Haul ar Nos Hir (Sain)
- Lawr y Lein, Gillian Elisa a'i Ffrindiau, Mehefin 2006 (Sain)
Llyfryddiaeth[golygu | golygu cod]
- Gillian Elisa (Tachwedd 2007). Cyfres y Cewri: 32. Hyd yn Hyn. Caernarfon: Gwasg Gwynedd. ISBN 9780860742432
Cyfeiriadau[golygu | golygu cod]
- ↑ Bywgraffiad Gillian Elisa. Sain.
- ↑ Gillian Elisa - Bywgraffiad. Gillian Elisa. Adalwyd ar 29 Mehefin 2016.
- ↑ Gillian Elisa'n Cofio cymeriadau ei gorffennol. , Daily Post, 13 Chwefror 2010. Cyrchwyd ar 29 Mehefin 2016.
- ↑ (Saesneg) Theo Bosanquet (7 Ionawr 2015). Gillian Elisa takes over from Ann Emery as Grandma in Billy Elliot. What's On Stage.
Dolenni Allanol[golygu | golygu cod]
- Gillian Elisa ar wefan Internet Movie Database
- Gwefan swyddogol Archifwyd 2009-06-08 yn y Peiriant Wayback.