Afon Mynach
Afon yng ngogledd Ceredigion yw Afon Mynach. Mae'n un o lednentydd Afon Rheidol ac yn rhoi ei henw i bont enwog Pontarfynach ("Devil's Bridge"). Hyd: tua 7 milltir.
Mae prif darddle'r afon yn gorwedd ym mryniau Elenydd tua 5 milltir i'r dwyrain o bentref Ponterwyd. Fel Rhuddnant mae'n cael ei hadnabod am ran gyntaf ei chwrs. Mae'r ffrwd honno ac afon Myherin yn cwrdd tua 3 milltir o Bontarfynach a gelwir yr afon yn 'Afon Mynach' am weddill ei chwrs.
Wrth dynesu at Bontarfynach mae'r afon yn disgyn trwy gwm coediog a cheir Rhaeadr Mynach yma ger y bont (tair pont, mewn gwirionedd). Mae'r ffordd A4120 yn croesi'r afon ar Bontarfynach. Yn fuan ar ôl hynny ceir cymer Afon Mynach yn Afon Rheidol; mae Rheidol yn llifo tua'r gorllewin ac yn aberu ym Mae Ceredigion yn harbwr Aberystwyth.
